ამის შესახებ ინფორმაციას მედიაჩეკერი ავრცელებს.

რატომ არის მნიშვნელოვანი: კინწურაშვილი მედიასთან ინტერვიუში საუბრობს, რომ არ ემხრობა ტელეკომპანია იმედის ღიად გაცხადებულ პროსამთავრობო საინფორმაციო პოლიტიკას.

  • მსახიობმა არა ერთხელ გააკრიტიკა ხელისუფლება, მათ შორის, რუსულ კანონთან დაკავშირებით და თქვა, რომ ამ კანონით ძალიან ბევრი რამე დგას საფრთხის წინაშე.
  • კინწურაშვილი წლებია, იმედის ერთ-ერთი გამორჩეული სახეა, მას დილის შოუ და ცეკვავენ ვარსკვლავები მიჰყავდა.

დეტალები: მედიასთან საუბრისას განმარტავს, რომ მიუღებელია, როცა სახელმწიფო უხვევს დასავლურ კურსს, როგორც ქვეყნის მოქალაქეთა უმრავლესობის არჩევანს და რომ ეს რუსული კანონია, ჩანს არა მხოლოდ შინაარსში, არამედ იმ გამოცდილებაშიც, რაც რუსეთის მაგალითის სახით გვაქვს.

  • "ისიც, რაც გუშინ გააკეთა ხელისუფლებამ, რუსულია. ზუსტად ეს არის პრობლემა", — თქვა კინწურაშვილმა.
  • ამბობს, რომ იმედიდან 1 კვირის წინ წამოვიდა, რადგან რუსული კანონი "უკანასკნელი წვეთი იყო".
  • "ვფიქრობ, ყველა ადამიანს საკუთარი საბრძოლველი აქვს და ამ ბრძოლაში ის ინსტრუმენტები უნდა გამოიყენოს, რაც დააგროვა შეგნებითა და გამოცდილებით", — განაცხადა მსახიობმა.
  • განმარტავს, რომ არასდროს ეთანხმებოდა იმედის საინფორმაციო პოლიტიკას და ღიადაც აფიქსირებდა ამას, მაგრამ როდესაც საქმე ეხება ღალატს, ეს უკვე აღარაფერში წერია.

კახა კინწურაშვილი ამბობს, რომ მეგობრებთან და ოჯახის წევრებთან ერთად, ყოველგვარი პარტიული კუთვნილების გარეშე, იდგა იმის წინააღმდეგ, რაც ქვეყნის განვითარებას აფერხებს, ამას კი არ ეწინააღმდეგება ეს არხი.

  • "პირიქით, მხარდამჭერია და მიჰყვება ამ ღალატში ხელისუფლებას, შესაბამისად, რა თქმა უნდა, მე მანდ ვერ ვიქნებოდი. მე, ჩემი გასაკეთებელი გავაკეთე, რომ ვიყო მართალი საკუთარ თავთან და სინდისთან", — ამბობს მსახიობი მედიაჩეკერთან.

On.ge ცდილობს კახა კინწურაშვილთან დაკავშირებას, თუმცა ის ჩვენს სატელეფონო ზარს არ პასუხობს.