ნიუ-იორკის City College-ის დამამთავრებელი კურსის სტუდენტებს მიშელ ობამამ სიტყვით მიმართა და ამერიკის მრავალფეროვნებაზე ისაუბრა.

"პირველ რიგში მინდა იცოდეთ, რატომ ავირჩიე ეს ქალაქი და კოლეჯი ამერიკის სხვა ქალაქებს, კოლეჯებსა და უნივერსიტეტებს შორის", - მიმართა მან დამამთავრებელი კლასის სტუდენტებს - "169 წლის კოლეჯში 150 ქვეყნიდან ჩამოსული სტუდენტები არიან, რომლებიც 100-ზე მეტ ენაზე საუბრობენ და წარმოადგენენ ყველა შესაძლო კულტურას, რასას, რწმენასა და ცხოვრების მიმართ დამოკიდებულებას".

CNN-ის თქმით, თავისი "შეფუთული სიტყვებით" ის ამერიკის პრეზიდენტობის კანდიდატს დონალდ ტრამპს მიმართავდა, როდესაც საუბრობდა რომ "ზოგი ადამიანი" პატივს არ სცემს იმ მრავალფეროვნებას, რომელსაც ეს კოლეჯი წარმოადგენს:

"ისინი ჩვენს განსხვავებულობას საფრთხედ აფასებენ. ამბობენ, რომ უნდა გვეშინოდეს მათი და ეჭვი უნდა შევიტანოთ მათში, ვისაც არ ვეთანხმებით.

მაგრამ, აქ, ამერიკაში, ჩვენ შიშს არ ვუთმობთ ასპარეზს. ჩვენ არ ვაშენებთ კედლებს რომ დავტოვოთ ადამიანები გარეთ, რადგან ვიცით, რომ ჩვენი დიდებულება ყოველთვის დამოკიდებული იყო იმ ადამიანების შრომაზე, რომლებიც სხვა ქვეყნებში დაიბადნენ, მაგრამ ჩამოვიდნენ და აქ იპოვნეს სახლი".

დონალდ ტრამპმა პირობა დადო, რომ პრეზიდენტობის შემთხვევაში ის ააშენებდა კედელს ამერიკასა და მექსიკას შორის და აუკრძალავდა მუსლიმებს აშშ-ში შესვლას. მან ასევე თქვა, რომ სირიელი მიგრანტების მიღება საშიში იქნებოდა ამერიკისთვის, რადგან მათ შორის შესაძლოა ტერორისტები ყოფილიყვნენ.

ამერიკის პირველმა ლედიმ თავის სიტყვაში ასევე თქვა, რომ ამერიკული ოცნება "ნამდვილი და ცოცხალია" და როგორც ამ კოლეჯის სტუდენტების, ისევე მისი ცხოვრებაა ამისი მაგალითი:

"ამისი მოწმე ვარ ყოველ დღე, როდესაც ვიღვიძებ სახლში, რომლებიც ააშენეს მონებმა და ვუყურებ ქალიშვილებს, ორ ულამაზეს შავკანიან ახალგაზრდა ქალბატონს, რომლებიც ხელის უქნევენ და სკოლაში წასვლის წინ ემშვიდობებიან მამას, ამერიკის შეერთებული შტატების პრეზიდენტს, რომელიც კენიელი კაცის შვილია, რომელიც მრავალი წლების წინ ჩამოვიდა ამერიკაში განათლების მისაღებად და უკეთესი ცხოვრების საძებნელად".

ეს მიშელ ობამას ბოლო სიტყვა იყო დამამთავრებელი კურსის სტუდენტებთან პირველი ლედის რანგში.