ძლიერი წვიმისა და სეტყვის შედეგად ქალაქი რუსთავი დაიტბორა. წვიმამ, რომელიც დაახლოებით 40 წუთის განმავლობაში გრძელდებოდა, ყველაზე მეტად, მე-7 და მე-8 მიკრო რაიონების მოსახლეობა დააზარალა. იაღლუჯის მთის ფერდობიდან წამოსულმა ნიაღვარმა ეზოები და რამდენიმე საცხოვრებელი კორპუსის სარდაფი დატბორა, ხოლო აღმაშენებლის ქუჩის გზის მონაკვეთზე ასფალტის საფარი ჩავარდა.

რუსთავის მერის, დავით ჯიქიას ინფორმაციით, სანიაღვრე სისტემის ნორმალურად მუშაობის მიუხედავად, სისტემამ დიდი ოდენობის ნალექის გატარება მაინც ვერ მოასწრო:

"მე-7 მიკრო რაიონის დაახლოებით ნახევარი დაიტბორა. დატბორილია სარდაფები, დატბორილია პირველი სართულები. რუსთავის მე-2 მხარეს ვხედავთ, რომ გზებია ჩავარდნილი".

ადგილობრივი მაცხოვრებლები განმარტავენ, რომ თავსხმა წვიმა 20-30 წუთის განმავლობაში გრძელდებოდა. დატბორილი ქუჩებისა და სარდაფების გაწმენდითი სამუშაოები მთელი ღამის განმავლობაში მიმდინარეობდა.

სეტყვის შედეგად საგარეჯოსა და სიღნაღის სოფლებიც დაზარალდა. ადგილობრივი მაცხოვრებლების განმარტებით, სეტყვა დაახლოებით 10 წუთს გრძელდებოდა, რის შედეგადაც მიწის ნაკვეთები და მარცვლეული კულტურა დაიტბორა. გარდა ამისა, სეტყვამ ვენახები ბოდბეშიც გაანადგურა.

სტიქიის შედეგებს სპეციალური კომისია შეისწავლის. ზარალის ზუსტი ოდენობა კომისიის მუშაობის დასრულების შემდეგ გახდება ცნობილი.