პროკურატურის თანამშრომლებმა Birja Mafia-ს დაკავებული წევრები გამოკითხა, თუმცა, მათ ნარკოდანაშაულის ბრალდებით დაკავებასთან დაკავშირებით დაიწყება თუ არა გამოძიება უცნობია. გლდანის წინასწარი დაკავების იზოლატორში მიშკა მგალობლიშვილისა და გიორგი ქებურიას გამოკითხვა რამდენიმე საათი გაგრძელდა.

"ჩვენ მიერ გამოიკითხა ორივე ბრალდებული, მგალობლიშვილი და ქებურია. მათ მოგვაწოდეს ინფორმაცია დაკავებასთან დაკავშირებით. კონკრეტულად მიგვითითებდნენ იმ სამართალდარღვევაზე, რაზეც ადვოკატები და ასევე თავად აპელირებდნენ სასამართლო პროცესზე. ჩვენ მიერ, რა თქმა უნდა, სრულად იქნა ასახული ეს ინფორმაცია, გადავხედავთ ყველა ამ დეტალს, შევაფასებთ და ამის შემდეგ მივიღებთ კანონის შესაბამის გადაწყვეტილებას, გამოძიების დაწყებასთან დაკავშირებით", - აღნიშნა პროურორმა, დავით გუმბერიძემ.

Birja Mafia-ს წევრები, გიორგი ქებურიასა და მიშკა მგალობლიშვილს თბილისის საქალაქო სასამართლომ წინასწარი პატიმრობა შეუფარდა. მათ სამართალდამცავები დიდი ოდენობით ნარკოტიკული საშუალება MDMA-ს შეძენა-შენახვას ედავებიან. რეპერების თქმით, მათ ნარკოტიკი ჩაუდეს და რეალურად, მათზე შური იმ კლიპის გამო იძიეს, სადაც პოლიციელი გააშარჟეს. ბრალის დამტკიცების შემთხვევაში რეპერებს 8-დან 20 წლამდე ან უვადო თავისუფლების აღკვეთა ემუქრებათ.