ამის შესახებ რუსმა ბიზნესმენმა Der Spiegel-თან თქვა, მისი კომენტარი კი პრიგოჟინის პრესსამსახურმა თავად გაავრცელა.

რატომ არის მნიშვნელოვანი: ევგენი პრიგოჟინი პუტინთან დაახლოებული პირი და პროპაგანდისტია.

  • მის სახელთანაა დაკავშირებული ვაგნერის სამხედრო დაჯგუფება, რომლის წევრებიც არაერთი ქვეყნის გახმაურებულ საქმეებში მონაწილეობდნენ.
  • არაერთი ბრალდების მიუხედავად, აქამდე პრიგოჟინი როგორც ამ ჯგუფთან, ასევე, ე.წ. ტროლების ქარხანასთან კავშირს უარყოფდა.
  • თუმცა ის და მისი ტროლები 2016 წლის აშშ-ის არჩევნებში ჩარევასა და გავლენის მოხდენაში დაადანაშაულეს.

დეტალები: პრიგოჟინს მოუწია ეთქვა, რომ დააარსა და დააფინანსა "ინტერნეტის კვლევისსააგენტო", რა გზითაც იგი აშშ-ის 2016 წლის საპრეზიდენტო არჩევნებში ჩაერია.

  • თუმცა, თავად პროპაგანდისტი ამტკიცებს, რომ სააგენტო "რუსული საინფორმაციო სივრცის დასავლეთის აგრესიული პროპაგანდისგან დასაცავად" შექმნა.
  • "მე არასდროს ვყოფილვარ მხოლოდ ინტერნეტის კვლევის სააგენტოს დამფუძნებელი — ის მე მოვიფიქრე, შევქმენი და დიდი ხნის განმავლობაში ვმართავდი", — თქვა პრიგოჟინმა.

არქივიდან: კრემლს აშშ-ის არჩევნებში ჩარევაში 2016 წლიდან, მას შემდეგ ადანაშაულებენ, რაც რუსეთთან დაკავშირებულმა ჰაკერებმა დემოკრატიული ეროვნული კომიტეტისა და ჰილარი კლინტონის კამპანიის თავმჯდომარის ჯონ პოდესტასგან ელფოსტები გატეხეს.

  • 2018 წელს აშშ-მა პრიგოჟინს ინტერნეტის კვლევის სააგენტოსთან კავშირების გამო სანქციები დაუწესა.
  • 2022 წლის ივლისში აშშ-ს სახელმწიფო დეპარტამენტმა დააწესა 10 მილიონი დოლარის ჯილდო მათთვის, ვინც პრიგოჟინის მიერ აშშ-ს არჩევნებში ჩარევაზე ინფორმაციას მოიპოვებდა.