სულ მალე ჩარლზ დიკენსის ცნობილი რომანის, დიდი იმედების, ახალ ეკრანიზაციას ვიხილავთ — კლასიკოსი ავტორის წიგნის მიხედვით სტივენ ნაითმა მინისერიალი გადაიღო. BBC Studios-ის ნაწარმოებში მთავარ როლს ოსკაროსანი ინგლისელი მსახიობი, ოლივია კოლმანი, განასახიერებს. კოლმანი მის ჰევიშემს ითამაშებს, მასთან ერთად კი, პიპის როლს ფიონ უაითჰედი მოირგებს.

ცოტა ხნის წინ გავრცელდა სერიალის პირველი თიზერიც, სადაც მის ჰევიშემისა და პატარა პიპის პირველ შეხვედრას ვხედავთ.

"რა საოცარი არსება დაგვიჭერია მდინარეში თევზაობისას", — ამბობს კოლმანის პერსონაჟი ობოლი ბავშვის დანახვაზე.

დიდი იმედები ყველა დროის ერთ-ერთი ყველაზე აღიარებული ინგლისელი მწერლის, ჩარლზ დიკენსის, გამორჩეული ნაწარმოებია. ავტორისეული ბილდუნგსრომანის ფორმით მოთხრობილი პიპის ამბავი მკითხველების ერთ-ერთ საყვარელ ისტორიად რჩება დღემდე. სხვადასხვა დროს რომანის ათობით კინო, სატელევიზიო და სასცენო ადაპტაცია შეიქმნა.

რაც შეეხება ახალი სერიალის მთავარ ვარსკვლავს, უამრავი პრესტიჟული პრემიის მფლობელ ოლივია კოლმანს მაყურებელი კარგად იცნობს გახმაურებული სერიალებიდან საბრალონი და გვირგვინი. ამ უკანასკნელში მან დედოფალი ელიზაბეთის როლი განასახიერა და ამისთვის ოქროს გლობუსის ჯილდოც დაიმსახურა.

ამასთან, სერიალის შემქმნელი სტივენ ნაითი დიკენსის ერთგული ფანია. მწერლის მოთხრობის, საშობაო სიმღერის, მიხედვით 2019 წელს სცენარისტმა და პროდიუსერმა ფენტეზი მინისერიალიც გადაიღო.

ნაითისეულ დიდ იმედებს მაყურებელი 26 მარტიდან იხილავს.