დღეს ზუგდიდში ბადრი ესებუას სასამართლო პროცესი გაიმართა, რომელსაც ბრალდებული დისტანციურად ესწრებოდა.

რატომ არის მნიშვნელოვანი: 2020 წლის 21 ოქტომბერს საქართველოს ბანკის ზუგდიდის ფილიალში შეიარაღებული პირი შეიჭრა, რომელმაც მძევლები აიყვანა. ის ნახევარ მილიონ დოლარს, ასევე, ვერტმფრენს ან მანქანით, მძევლებთან ერთად ტერიტორიის უსაფრთხოდ დატოვების გარანტიას ითხოვდა.

  • ღამის 11 საათისთვის თავდამსხმელმა სამ მძევალთან ერთად საქართველოს ბანკის ტერიტორია დატოვა და გაურკვეველი მიმართულებით წავიდა, დანარჩენი მძევლები კი სამართალდამცავებმა შენობიდან გამოიყვანეს.
  • დილის ხუთი საათისთვის ცნობილი გახდა, რომ თავდამსხმელმა სამივე მძევალი გაათავისუფლა და თავად ფულთან ერთად გაიქცა.
  • 12 დეკემბერს დააკავეს ბადრი ესებუას ძმა, ბიძინა ესებუა. ის ცეცხლსასროლი იარაღის, საბრძოლო მასალის, ფეთქებადი ნივთიერებისა და ასაფეთქებელი მოწყობილობის მართლსაწინააღმდეგო ტარების ბრალდებით დააკავეს.
  • პოლიცია ესებუას ორი წლის განმავლობაში ეძებდა და მისი დაკავება შსს-მ 8 თებერვალს დაადასტურა.
  • ის დაკავებულია ტერორისტული აქტის, ტერორისტული მიზნით მძევლად ხელში ჩაგდების, ცეცხლსასროლი იარაღის, საბრძოლო მასალისა და ასაფეთქებელი მოწყობილობის მართლსაწინააღმდეგო შეძენა-შენახვა-ტარების ბრალდებით.
  • ესებუა ბრალს არ აღიარებს.

დეტალები: სასამართლო პროცესზე პროკურორმა განაცხადა, რომ ის რამდენიმე წლის განმავლობაში სამართალდამცავებს ემალებოდა, ასევე სახლში ჩხრეკისას აღმოაჩნდა ცეცხლსასროლი იარაღი.

  • გარდა ამისა, ბრალის აღიარებით არ გამოცხადებულა პოლიციაში, ის საგამოძიებო მოქმედებების შედეგად დააკავეს.
  • ამიტომ პროკურორმა დააყენა შუამდგომლობა, რომ ესებუას აღმკვეთი ღონისძიების სახით პატიმრობა შეეფარდოს, თუმცა დაცვის მხარემ განმარტა, რომ ესებუას უკვე შეფარდებული აქვს პატიმრობა ერთ საქმეზე და პატიმრობის ორჯერ გამოყენება საჭირო არაა.
  • რაც პროკურორმა გაითვალისწინა და დაცვის მხარის მოთხოვნა დააკმაყოფილა.
  • ესებუას მორიგი სასამართლო პროცესი 30 მარტს ჩაინიშნა.