On.ge-ს ინფორმაციით, ნიკა გვარამიას გადაწყვეტილება გადადგომის შესახებ, ტელეკომპანიის მფლობელებმა დააკმაყოფილეს. ამის შესახებ რუსთავი 2-ის ერთ-ერთმა მფლობელმა, გია ყარამანიშვილმა თანამშრომლებს თათბირზე განუცხადა.

როგორც ჩვენთვის გახდა ცნობილი, ყარამანიშვილმა თანამშრომლებს უთხრა, რომ მას ჯერ არ ჰყავს შერჩეული ვინ იქნება ტელეარხის ახალი დირექტორი, რადგან გვარამიას გადაწყვეტილება მისთვის შოკისმომგვრელი იყო და აქამდე ამის შესახებ არ უფიქრია. ყარამანიშვილი ასევე ამბობს, რომ დირექტორის პოსტზე არ განიხილება კობა ნაყოფიას კანდიდატურა.

On.ge-ს წყაროს ცნობით, თათბირი რომელსაც არხის მფლობელი გია ყარამანაშვილი ატარებდა, დატოვეს არხის ოპერატორებმა, მიზეზად კი ფინანსური პრობლემებია. ყარამანიშვილმა მათ პრობლემის დროულად მოგვარების პირობა ვერ მისცა, რამაც თანამშრომელთა ნაწილის გულისწყრომა გამოიწვია. On.ge-სთვის ცნობილია ისიც, რომ თანამშრომელთა ნაწილი ყარამანიშვილისგან გვარამიას თანამდებობაზე დაბრუნებას ითხოვს.

8 ივნისს, საღამოს, გავრცელდა ინფორმაცია, რომ ნიკა გვარამიამ თანამდებობა დატოვა, თუმცა, საჯაროდ ეს ფაქტი ჯერ არც დამფუძნებლებს დაუდასტურებიათ და არც გვარამიას.

On.ge-ს ინფორმაციით, ყადაღისა და დროში გაწელილი სასამართლო პროცესების გამო, არხს აქვს ფინანსური პრობლემები, რაც შეიძლება გამხდარიყო გვარამიას მიერ თანამდებობის დატოვების ერთ-ერთი მიზეზი. On.ge კვლავ ცდილობს გვარამიას გადადგომის შესახებ დამატებითი ინფორმაციის მოძიებას.