კრიმინალურ პოლიციას შინაგან საქმეთა მინისტრი, გიორგი მღებრიშვილის კურატორობს, მისი პირველი მოადგილე, ბესიკ ამირანაშვილი კი დაკავებული თანამდებობიდან გათავისუფლდა. ეს ინფორმაცია გიორგი მღებრიშვილმა თვითონ გააჟღერა.

შსს-ს ინფორმაციით, ბესიკ ამირანაშვილი "კადრების განკარგულებაშია გადავიდა", რაც იმას ნიშნავს, რომ ის უწყების რიგებში კვლავ ირიცხება, თუმცა, გაფრთხილებულებია სამსახურიდან მოსალოდნელი გათავისუფლების შესახებ.

ბესიკ ამირანაშვილი შინაგან საქმეთა სამინისტროს სხვადასხვა პოზიციაზე 2007 წლიდან მუშაობს. 2016 წლიდან კი მინისტრის პირველი მოადგილის თანამდებობა უკავია.

შინაგან საქმეთა სამინისტროში არ განმარტავენ მიზეზს რატომ გათავისუფლდა მინისტრის პირველი მოადგილე თანამდებობიდან და უკავშირდება თუ არა მის საქმიანობას.

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის თბილისიდან სწორედ კრიმინალური პოლიციის ფორმიანმა პირებმა გაიტაცეს, რასაც საქართველოს შსს უარყოფს. უწყება ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.