თანამედროვე ეპოქაში ფორმალური განათლება საკუთარი თავის რეალიზებისთვის საკმარისი აღარ არის. მნიშვნელოვანია, რომ ახალგაზრდებმა უნივერსიტეტსა თუ სკოლაში მიღებული განათლების გარდა, საკუთარი ნებითა და ძალებით, სხვადასხვა საკითხებში ზოგადი ცოდნა გაიღრმაონ. ამას კარგად ხვდებიან თბილისის თავისუფალი უნივერსიტეტის სტუდენტებიც, რომლებმაც 2014 წელს საგანმანათლებლო პროექტი Art Weekend დააფუძნეს.

Art Weekend თავისუფალი უნივერსიტეტის მართვისა და საზოგადოებრივი მეცნიერებების სკოლის სტუდენტების პროექტია და პირველად 2014 წელს ჩატარდა. პროექტის მთავარი მიზანია სტუდენტების ინტერესები ფორმალური გარემოდან არაფორმალურ, უშუალო გარემოში გადაიტანოს და საშუალება მისცეს მათ, მოისმინონ მათთვის საინტერესო ლექციები მათთვის საინტერესო სპიკერებისგან.

ამასთან, სტუდენტებს საშუალება ეძლევათ განიხილონ ის თემები, რომელსაც უნივერსიტეტში ნაკლებად ეხებიან და იმსჯელონ მოწვეულ სტუმრებთან ერთად. სტუმრები ძირითადად არა ლექტორები, არამედ ზოგადად წარმატებული და საინტერესო პირები არიან. მაგ: წამყვანები, მსახიობები, კრეატიული ადამიანები, მწერლები, პოეტები და ა.შ.

Art Weekend-ზე ინტელექტუალური საუბრების გარდა, მუსიკაც მნიშვნელოვანია. წელს პროექტს ცნობილი ქართული ჯგუფი არა დახურავს.

პროექტი წელს მეოთხედ ტარდება და ახალგაზრდებში უკვე დიდ ინტერესს იწვევს. 2014-2015 წლებში Art Weekend-ს სალომე ბენიძე, ნიკო ნერგაძე, ზაზა შათირიშვილი, კოტე ყუბანეიშვილი, ანა კორძაია-სამადაშვილი, ნიკა მაჩაიძე,ლევან გიგინეიშვილი, რეზო კიკნაძის ბენდი, თავისუფალი უნივერსიტეტის ლექტორები - გიორგი კეკელიძე, ზაალ ჩხეიძე, ნიკოლოზ ალექსიძე და სხვები სტუმრობდნენ.

Art Weekend 2017-ის სტუმრების სია

Art Weekend 2017-ის სტუმრების სია

ფესტივალზე არანაირი ასაკობრივი შეზღუდვა არ არსებობს. მსურველებს არც ბილეთების შეძენა მოუწევთ, რადგან პროექტი თავიდან ბოლომდე არაკომერციულია. როგორც ორგანიზატორები ამბობენ, არც მოწვეული სპიკერები, არც ორგანიზატორები და არც მუსიკოსები, თანხას არ იღებენ. პროექტის ერთადერთი მთავარი მიზანი რამდენიმე დღის სასიამოვნოდ და ნაყოფიერად გატარებაა.

ორგანიზატორების თქმით, Art Weekend-ზე დასასწრებად ერთადერთი მოთხოვნა არსებობს: მაქსიმალურად ისიამოვნოთ პროექტით, მოწვეული სპიკერებით და გარემოთი.

"ვფიქრობთ ცხელ ზაფხულში, ფინალურ გამოცდებამდე ეს იდეალური შესაძლებლობაა საინტერესოდ გაატაროთ კვირის ბოლო. ჩვენ კი, ჩვენი მხრივ, გამაგრილებელი სასმელებით, ჩიფსებით, სასიამოვნო გარემოთი, კარგი ლექციებითა და არაჩვეულებირვი მუსიკით გაგიმასპინძლდებით", ამბობს პროექტის ერთ-ერთი ორგანიზატორი.

Art Weekend-ი ცხრა, ათ და თერთმეტ ივნისს, კახა ბენდუქიძის საუნივერსიტეტო კამპუსში ჩატარდება. როგორც უკვე აღვნიშნეთ, დასწრება თავისუფალია. პროექტს ლევან გიგინეიშვილი გახსნის და ის ჰარპერ ლის საკულტო ნაწარმოების, ნუ მოკლავ ჯაფარას შესახებ ისაუბრებს.