სააკაშვილის ამჟამინდელ ჯანმრთელობის მდგომარეობაზე ვივამედის კლინიკურმა დირექტორმა, ზურაბ ჩხაიძემ ფორმულასთან ისაუბრა.

რატომ არის მნიშვნელოვანი: სააკაშვილის ინფიცირების შესახებ ინფორმაცია მისმა ადვოკატმა, შალვა ხაჭაპურიძემ გაავრცელა.

  • "სააკაშვილს კოვიდი დაუდასტურდა! როგორ? ყველა შეფუთული შევდივართ! დღესაც გონება დაკარგა!" — დაწერა მან.

დეტალები: ჩხაიძე ამბობს, რომ ექსპრეზიდენტს ვირუსის დამახასიათებელი ისეთი სიმპტომები აღენიშნება, როგორიცაა სახსრების ტკივილი და ტემპერატურის მატება.

  • კითხვაზე, აქვს თუ არა სუნთქვის უკმარისობა, ამბობს, რომ არა.
  • "მკურნალობის შესაბამის გეგმაზე შევთანხმდით, რომელიც უტარდება პაციენტს", — აცხადებს ჩხაიძე.
  • მისივე თქმით, პროგნოზული თვალსაზრისით, ინფიცირება "რა თქმა უნდა, გარკვეულ რისკებს შეიცავს".

სააკაშვილის ოჯახის წევრები, ექიმები და ადვოკატები ექსპრეზიდენტის ჯანმრთელობის მკვეთრ გაუარესებაზე საუბრობენ და საზღვარგარეთ მის სამკურნალოდ გადაყვანას ითხოვენ.

  • ყოფილი პრეზიდენტის ჯანმრთელობის მდგომარეობაზე ცენტრ ემპათიის დასკვნაში ნათქვამია, რომ "მოსალოდნელია კომა და სიკვდილი".
  • თბილისის საქალაქო სასამართლოში ბოლო კვირებია საქართველოს ყოფილი პრეზიდენტის სასამართლო პროცესი იმართება, სადაც სასჯელის გადავადებას ან სასჯელისგან გათავისუფლებას განიხილავენ.

სასამართლოზე უცხოელი ექსპერტები გამოიკითხნენ. ამერიკელი ექსპერტის, ნევროლოგ ემანუელ ლახანის განცხადებით, სააკაშვილის სერიოზული დაავადებები ხელისშემშლელი ფაქტორია სასჯელის მოხდისთვის.