საყოფაცხოვრებო ნარჩენის დახარისხება და გადამუშავებადი მასალის გამოცალკევება გარემოს დასაცავად ერთ-ერთი მნიშვნელოვანი ქმედებაა. პლასტმასით დაბინძურება მთელ მსოფლიოში დღემდე რჩება მწვავე პრობლემად, რომელიც გავლენას ახდენს არა მხოლოდ ცალკეულ ეკოსისტემებზე, არამედ ყველა ჩვენგანის საცხოვრებელზეც.

სწორედ ამიტომ, ქართული კომპანია ტენე, რომელიც ეკომეგობრული ცხოვრების სტილის პოპულარიზაციას ცდილობს, მომხმარებელს ნარჩენების სანაცვლოდ სასარგებლო პროდუქციის მიღებას სთავაზობს. საწარმო სხვადასხვა სახის საყოფაცხოვრებო მყარ ნარჩენს იბარებს — თითოეული მათგანის ღირებულება შესაბამისი ქულითაა განსაზღვრული. დაგროვებული ქულებით კი თქვენ ჯინვენტორის ონლაინმაღაზიაში პროდუქციის შეძენას შეძლებთ.

ნარჩენების ჩაბარება ჯერჯერობით მხოლოდ თბილისშია შესაძლებელი. თუმცა, ტენეს ცნობით, სამომავლოდ პუნქტების დამატება იგეგმება — მათ შორის, რეგიონებში.

აღსანიშნავია, რომ მსგავსი პროექტი ტენეს წინა წლებშიც ჰქონდა. 2021 წელს კომპანია მომხმარებელს პლასტმასის 100 თავსახურის სანაცვლოდ ეკომეგობრულ USB კაბელს სთავაზობდა.

ტენე რამდენიმე წლის წინ დაფუძნდა და თავდაპირველად USB კაბელებს ჰყიდდა ადგილობრივ ბაზარზე. მოგვიანებით, იმპორტირებული პროდუქცია კომპანიის მიერვე წარმოებულმა ჩაანაცვლა — საწარმომ პლასტმასის მოხმარებული ნივთების გადამუშავება და ამის საშუალებით ეკომეგობრული პროდუქტის შექმნა დაიწყო.

სამეწარმეო საქმიანობის გარდა, კომპანია აქტიურად ცდილობს გარემოს დაცვის საკითხებზე საზოგადოებაში ცნობიერების ამაღლებას.