ამის შესახებ მაგნიტსკის აქტის ავტორმა TV პირველთან ინტერვიუში ისაუბრა.

რატომ არის მნიშვნელოვანი: 8 იანვარს მიხეილ სააკაშვილმა ბილ ბროუდერს მიმართა, ქართულ ჯგუფებს ახალი მაგნიტსკის სიის შექმნაში დაეხმაროს.

  • "მე მკლავენ ციხეში ზუსტად ისე, როგორც მაგნიტსკის, მაგრამ ბევრად უფრო აშკარად და საჯაროდ", — ნათქვამი იყო ექსპრეზიდენტის წერილში.
  • მოგვიანებით ბრაუდერმა მას Twitter-ზე უპასუხა და სააკაშვილს იმ დოკუმენტების გადაცემა სთხოვა, სადაც ჩანს, თუ ვინ არიან პასუხისმგებლები წამებასა და მოწამვლაზე, რაზეც ყოფილი პრეზიდენტი საუბრობს.

ბროუდერი ფიქრობს, რომ თუ სააკაშვილი პატიმრობაში მოკვდება, რამდენიმე პირის წინააღმდეგ სანქციები გარდაუვალი იქნება და ეს ქართველ პოლიტიკოსებს "დიდ თავის ტკივილს გაუჩენს".

  • "იმედი მაქვს, რომ ადამიანები, რომლებიც ახლა გადაწყვეტილებებს იღებენ, შეწყვეტენ ასეთ ქმედებას, რადგან თუ ეს ადამიანი — სააკაშვილი მოკვდება, მათ მძიმე ცხოვრება ელოდებათ წინ [TV პირველის თარგმანი]".
  • მისივე თქმით, აშკარაა, რომ ექსპრეზიდენტს აწამებენ, ამისთვის კი სამედიცინო ექსპერტი საჭირო არაა, რადგან ფოტოებიდან ჩანს.
  • ამბობს, რომ საინტერესოა, თუ ვინაა პასუხისმგებელი, რადგან სამედიცინო დახმარების მიღებაზე მის თხოვნას პროკურორები აფერხებენ. ვარაუდობს, რომ არასათანადო აქტივობაში ციხის ექიმები და მთავრობის წარმომადგენლებიც არიან ჩართული.
  • "რაც მეტია ასეთი ინფორმაცია, მით უფრო სავარაუდოა, რომ შევქმნათ დროებით, როგორც ჩვენ ვეძახით "სააკაშვილის სია", სადაც შევიყვანთ იმ ადამიანებს, რომლებიც ამას აკეთებენ. ეს დაუჯერებლად ბოროტი ქმედებაა".

უფრო ვრცლად: როგორც ბროუდერი ამბობს, სააკაშვილის თემა ჰუმანიტარული საკითხია, საქართველოს მთავრობისგან კი ყოველდღიურად ისმის, რომ ექსპრეზიდენტს "ჯიუტად არ ათავისუფლებენ" და არ აგზავნიან ევროპაში სამკურნალოდ.

  • "ამგვარად საქართველო ანადგურებს მის რეპუტაციას საერთაშორისო დონეზე".
  • მისი აზრით, ამ ყველაფრის მიღმა რუსეთის პრეზიდენტი ვლადიმერ პუტინი დგას, ის ცდილობს შური იძიოს სააკაშვილზე, რომელიც უპატივცემულოდ მოექცა.
  • "ასევე, ეს არის მესიჯი ვოლოდიმირ ზელენსკისთვის, აი რა დაგემართება შენც მომავალში, ამიტომ ეს არ უნდა დავუშვათ".
  • ბროუდერის თქმით, საქართველოს მთავრობაში არსებობენ ადამიანები, რომლებსაც პუტინი მოსწონთ და ახლა აშკარაა, რომ ვითარება ნორმალური გზით არ მიდის.