რა მოხდა ბრაზილიაში

ეროვნულ კონგრესში შეჭრის კადრები საერთაშორისო და ადგილობრივ მედიებსა და სოციალურ ქსელებში ვრცელდება.

რატომ არის მნიშვნელოვანი: ყოფილი ულტრამემარჯვენე პრეზიდენტის მომხრეები გასული წლის ოქტომბრის არჩევნების შედეგებს არ აღიარებენ და ახლადარჩეული სოციალისტი პრეზიდენტის, ლუის ინასიუ ლულა და სილვას დასამხობად სამხედრო გადატრიალებას ითხოვენ.

ყვითელ და მწვანე ფერებში ჩაცმული მომიტინგეები კონგრესის გარდა სხვა სამთავრობო შენობებშიც, პრეზიდენტის სასახლესა და უზენაეს სასამართლოშიც შეიჭრნენ.
ლულას ინაუგურაცია ერთი კვირის წინ გაიმართა.

დეტალები: საერთაშორისო მედიების ცნობით, პრეზიდენტი მიტინგის ადგილას ზარალის შესამოწმებლად მივიდა და მომხდარი ვანდალურ და ფაშისტურ აქტად შეაფასა.

აქციის მიმდინარეობისას ბოლსონარუ ფლორიდაში იმყოფებოდა, საიდანაც მიტინგი დაგმო და ლულას ბრალდებები მის მიერ არეულობის წახალისებაზე უარყო.
ბრაზილიის გუბერნატორი, იბანეის როჩა, რომელიც ბოლსონარუს ყოფილი მოკავშირეა, შექმნილი ვითარების გამო თანამდებობიდან გაათავისუფლეს, ხოლო ქვეყნის მთავრობამ დედაქალაქის გარშემო უსაფრთხოების ნორმების გაამკაცრა.
მანამდე როჩამ სოციალურ ქსელში ვიდეო გაავრცელა, სადაც ბუნტის თავიდან ვერაცილების გამო ბოდიშს იხდის.

გამოხმაურებები: მსოფლიო პოლიტიკურმა ლიდერებმა უკვე დაგმეს მომიტინგეთა ქმედებები.

დიდი ბრიტანეთის მთავრობამ ლულას სრული მხარდაჭერა გამოუცხადა, აღნიშნეს, რომ ძალადობრივი ქმედებები გაუმართლებელია და ის დემოკრატიას ძირს უთხრის.
აშშ-ის პრეზიდენტის, ჯო ბაიდენის თქმით, ბრაზილიის დემოკრატიულ ინსტიტუტებს მათი სრული მხარდაჭერა აქვს და "ბრაზილიელი ხალხის ნება არ უნდა დაირღვეს".
საფრანგეთის პრეზიდენტმა, ემანუელ მაკრონმა ბრაზილიელ კოლეგას "უპირობო მხარდაჭერა" შესთავაზა.
კანადის პრემიერის, ჯასტინ ტრუდოს თქმით, ხალხის დემოკრატიული ნების პატივისცემა უმთავრესია ნებისმიერ დემოკრატიაში, ხოლო გერმანიის კანცლერმა, ოლაფ შოლცმა მომხდარს დემოკრატიაზე შეტევა უწოდა, რომელიც "არ შეიძლება, რომ მოითმინო".

ადგილობრივი მედიების ცნობით, პოლიციას ძალიან დიდი დრო დასჭირდა სიტუაციის კონტროლისთვის და ამას მძიმე შედეგებიც მოჰყვა.

გავრცელებულ კადრებში ჩანდა, რომ პოლიციამ მომიტინგეთა წინააღმდეგ ცრემლსადენი გაზი გამოიყენა.
ბრაზილიის უსაფრთხოების ძალები ამბობენ, რომ კონტროლი აღადგინეს და ასობით ადამიანია დაკავებული.
მემარცხენე პარტიები დღეს, 9 იანვარს კონგრესზე თავდასხმის საპასუხოდ აქციას გეგმავენ და მოქალაქეებს სან-პაულოში, ქვეყნის ყველაზე ხალხმრავალ ქალაქში მასიურ პროდემოკრატიულ მიტინგზე იწვევენ.
მსვლელობა ადგილობრივი დროით 18:00 საათზეა დაანონსებული.

ბოლო ამბები:

გირჩევთ