შინაგან საქმეთა მინისტრის მოადგილე შალვა ხუციშვილმა არჩევანის ეთერი, რომელიც საქართველოდან გატაცებული აზერბაიჯანელი ჟურნალისტის, აფგან მუხტარლის, თემას შეეხებოდა, დატოვა.

თავდაპირველად, მან აუდიტორიას პარკების მოხდა მოსთხოვა და დასძინა, რომ "პერფორმანსი უკვე შედგა". მას შემდეგ, რაც გადაცემის წამყვანმა, გიორგი გაბუნიამ შავი ტომრის მოხსნაზე უარი განაცხადა, შალვა ხუციშვილმა გადაცემა დატოვა. ეთერის დატოვებამდე მინისტრის მოადგილემ აღნიშნა, რომ წერილობით მიაწვდიდა თავის პოზიციას ჟურნალისტებს.

აფგან მუხტარლის მხარდასაჭერად, დღეს, ჟურნალისტებმა ადამიანის უფლებათა დაცვის კომიტეტში პროტესტი თავზე ტომრებით გამოხატეს.

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა.

საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს.