თიბისიმ და საქართველოს სათხილამურო ფედერაციამ პარტნიორობის შეთანხმება გააფორმეს, რომელიც ითვალისწინებს 2023 წლის 19 თებერვლიდან 5 მარტამდე პერიოდში ბაკურიანში ფრისტაილის, სნოუბორდისა და ფრისკის მსოფლიო ჩემპიონატის ჩატარებას. ჩემპიონატის ორგანიზატორია საქართველოს სათხილამურო ფედერაცია, ხოლო პარტნიორები თიბისი და სილქნეტი გახლავთ.

შეთანხმებას ხელი მოაწერეს თიბისის გენერალურმა დირექტორმა ვახტანგ ბუცხრიკიძემ და საქართველოს სათხილამურო ფედერაციის პრეზიდენტმა ზურაბ კოსტავამ. ღონისძიებაში მონაწილეობა მიიღო საქართველოს სათხილამურო ფედერაციის პრეზიდენტის მრჩეველმა და სილქნეტის სამეთვალყურეო საბჭოს თავმჯდომარემ, გიორგი რამიშვილმა.

ბაკურიანში დაგეგმილი მსოფლიო ჩემპიონატი ზამთრის სპორტის მთავარი მოვლენაა, რადგან საქართველომ ისტორიაში პირველად მოიპოვა უფლება, რომ ფრისტაილის, სნოუბორდისა და ფრისბის მსოფლიო პირველობას უმასპინძლოს. მსოფლიო ჩემპიონატის საქართველოში ჩატარება 2018 წლის მაისში, საბერძნეთის კურორტ კოსტა-ნავარინოში გამართულ საერთაშორისო სათხილამურო ფედერაციის 51-ე სათხილამურო კონგრესზე გადაწყდა.

"თიბისი ყოველთვის იქ არის, სადაც დიდი და კარგი საქმეები კეთდება", — აცხადებს ვახტანგ ბუცხრიკიძე, — "ჩემთვის ძალიან საამაყოა, რომ სათხილამურო ფედერაციასთან და სილქნეტთან პარტნიორობის ფარგლებში ვუმასპინძლებთ ფრისტაილის მსოფლიო ჩემპიონატს ბაკურიანში, რომელიც ჩვენი ქვეყნის სპორტულ ცხოვრებაში ისტორიული მოვლენაა. თიბისი ყოველთვის უჭერდა მხარს ჯანსაღი ცხოვრების წესის დანერგვასა და პოპულარიზაციას, განსაკუთრებით, ახალგაზრდებში. ამ მიზნით, არაერთი პროექტის ინიციატორი, მხარდამჭერი და პარტნიორები ვართ. საქართველოს სათხილამურო ფედერაციასთან თანამშრომლობა დიდ შესაძლებლობას იძლევა, რათა თიბისიმ კიდევ უფრო დიდი წვლილი შეიტანოს სპორტული აქტივობების პოპულარიზაციაში და ჩაერთოს მთავარი სპორტული მოვლენების ორგანიზებაში".

ჩემპიონატის საქართველოში ჩატარების მნიშვნელობას ხაზს უსვამს საქართველოს სათხილამურო ფედერაციის პრეზიდენტის მრჩეველი და სილქნეტის სამეთვალყურეო საბჭოს თავმჯდომარე, გიორგი რამიშვილიც.

"20 წელიწადზე მეტია, რაც ჩვენი ჯგუფი, ბოლო ათწლეულის განმავლობაში კი კომპანია სილქნეტი, საქართველოს სათხილამურო ფედერაციის გენერალური სპონსორია და დიდი წვლილი მიუძღვის მსოფლიო ჩემპიონატის საქართველოში ჩატარების საქმეში", — ამბობს რამიშვილი, — "ჩვენი მხარდაჭერით ფედერაცია ხელს უწყობს საქართველოს, როგორც ტურიზმის და ზამთრის სპორტის მასპინძელი ქვეყნის, პოტენციალის ამაღლებას და ზამთრის სპორტის პოპულარობის გაზრდას ახალგაზრდა თაობებში. ეს ნამდვილად დიდი საქმეა და მიხარია, რომ ქვეყნისთვის მნიშვნელოვან საქმეში დღეს ღირსეული პარტნიორი, თიბისი შემოგვიერთდა, რისთვისაც მათ დიდი მადლობა მინდა გადავუხადო. საქართველოს მთავრობის უპრეცედენტო მხარდაჭერით უმაღლესი ხარისხის ინფრასტრუქტურის განვითარების საქმეში და კერძო სექტორის ჩართულობით დღეს უკვე შესაძლებელია იმ ოცნების რეალობად ქცევა, რაც რამდენიმე წლის წინ წარმოუდგენელი იყო."