რეალობიდან გასაქცევს ეძებ? — Airbnb-ზე სახლი ჰობიტონში 6 დოლარად ქირავდება

რეალური სამყაროდან გასაქცევს ეძებ? ტოლკინის ლეგენდარიუმში წიგნებით ან ფილმებით მოგზაურობისას თუ ერთხელ მაინც გიოცნებია, ამ ზღაპრულ სამყაროში მოხვედრილიყავი, მაშინ, შენთვის საინტერესო შეთავაზება Airbnb-ზე შეიძლება დაგხვდეს.

საცხოვრებლის დაჯავშნის გლობალურ პლატფორმაზე ტოლკინისეული მაზრის სახლი გამოჩნდა. Airbnb-ზე მსურველებს ახალ ზელანდიაში, ბეჭდების მბრძანებლის გადასაღები მოედანზე, ჰობიტების პატარა საცხოვრებელი შეუძლიათ იქირაონ. მართალია, სახლი არცთუ მაღალია — რადგან ჰობიტებზეა გათვლილი — თუმცა, ეს უჩვეულო გამოცდილება არცთუ ძვირი სიამოვნებაა. ჰობიტონში ოთხ სტუმარზე გათვალისწინებულ საცხოვრებელში ღამის გათევა სულ რაღაც 10 ახალზელანდიური დოლარი ($6) ჯდება.

ადგილი, სადაც ახლა Airbnb-ზე გასაქირავებელი სახლი მდებარეობს, წინათ ხუთიოდე კვადრატულ კილომეტრზე გაშლილი საძოვარი იყო, რომელიც ბეჭდების მბრძანებლის ფილმების ტრილოგიის რეჟისორმა პიტერ ჯექსონმა ტოლკინის გამოგონილ სოფლად აქცია. ცხრა თვის განმავლობაში შემოქმედებითი ჯგუფი გამალებული მუშაობდა, საქმეში კი ახალი ზელანდიის არმიაც იყო ჩართული. ამ ხნის განმავლობაში მიწა ნამდვილად იქცა პირწავარდნილ ჰობიტონად, სადაც ჰობიტების 39 სოროც განთავსდა.