ბელარუსის მოსახლეობისადმი სასწრაფო მიმართვა უკრაინის შეიარაღებული ძალების გენერალურმა შტაბმა გაავრცელა.

რატომ არის მნიშვნელოვანი: როგორც ვიდეომიმართვაშია ნათქვამი, რუსეთის სპეცსამსახურები ბელარუსის ტერიტორიაზე პროვოკაციებს ამზადებენ.

  • გენშტაბის განცხადებით, ტერაქტების სამიზნე შეიძლება, იყოს კრიტიკული ინფრასტრუქტურის ობიექტები, კერძოდ — ატომური ელექტროსადგური ოსტროვეცი.

დეტალები: გენშტაბი მოუწოდებს ბელარუსის მცხოვრებლებს, არ დაუშვან მათი ქვეყნის ჩათრევა რუსეთის ომში უკრაინის წინააღმდეგ;

  • მათივე თქმით, რუსეთი ამას "ნებისმიერი საშუალებით" ცდილობს.
  • გენერალური შტაბი ბელარუსელებს მიმართავს, მოითხოვონ თავიანთი ხელმძღვანელობისგან კონსტიტუციის მე-18 მუხლის დაცვა, დააკვირდნენ საეჭვო პირთა და სატრანსპორტო საშუალებათა გადაადგილებას კრიტიკულ ინფრასტრუქტურულ ობიექტებთან და შეატყობინონ სამართალდამცველებს საფრთხის შემთხვევაში.
  • ხოლო, თუ მთავრობას სათანადო რეაქცია არ ექნება, აცნობონ მსოფლიო საზოგადოებას ყველა არსებული საშუალებით.