რესპუბლიკური პარტიის ერთ-ერთი ლიდერი, თამარ კორძაია ამბობს, რომ საქართველოს შეეძლო აზერბაიჯანელი ჟურნალისტის დაცვა და ვერ დაიცვა. ასე გამოეხმაურა კორძაია თბილისში, სახელმწიფო უსაფრთხოების სამსახურის შენობასთან საქართველოდან გატაცებული აზერბაიჯანელი ჟურნალისტის, აფგან მუხტარლის მხარდასაჭერ აქციას.

კორძაია მიიჩნევს, რომ სახელმწიფო უსაფრთხოების სამსახურის უფროსმა - ვახტანგ გომელაურმა, შინაგან საქმეთა მინისტრმა - გიორგი მღებრიშვილმა და ვიცე-პრემიერმა - ალექსანდრე ჯეჯელავამ თანამდებობები უნდა დატოვონ.

"ადამიანის უფლებების დარღვევისთვის პასუხი უნდა აგოს შესაბამისმა თანამდებობის პირებმა, სხვანაირად იმ სირცხვილს რომელიც ჩვენებმა ქვეყანამ ჭამა ვერანაირად ვერ ჩამოვირეცხავთ," - განუცხადა On.ge-ს კორძაიამ.

რესპუბლიკური პარტიის წევრი აღნიშნავს, რომ მუხტარლის დაცვა საქართველოს აღარ შეუძლია, რადგან ის უკვე აზერბაიჯანშია. მისი თქმით, საქართველოს ახლა, საერთაშორისო ორგანიზაციების მსგავსად შეუძლია, მხოლოდ გათავისუფლება მოითხოვოს.

სახელმწიფო უსაფრთხოების სამსახურის შენობასთან აზერბაიჯანელი ჟურნალისტის, აფგან მუხტარლის მხარდასაჭერი აქცია რამდენიმე წუთის წინ დაიწყო. აქციაზე შეკრებილები არიან მედიისა და არასამთავრობო ორგანიზაციების წარმომადგენელები.

აფგან მუხტარლი აზერბაიჯანის ხელისუფლების მიერ დევნილი ჟურნალისტია, რომელიც თავს თბილისს აფარებდა ოჯახთან ერთად. მისი ცოლის, ლეილა მუსტაფაევას თქმით, აფგანი თბილისში, სოლოლაკის ტერიტორიიდან 29 მაისს დაიკარგა, მოგვიანებით კი აღმოჩნდა, რომ ის აზერბაიჯანშია დაპატიმრებული საზღვრის უკანონოდ კვეთის ბრალდებით. მუსტაფაევას აინტერესებს, როგორ გადაკვეთა მუხტარლიმ საქართველო-აზერბაიჯანის საზღვარი მაშინ, როცა მისი პასპორტი თბილისში, სახლში ჰქონდა დატოვებული. თავად მუხტარლიმ აზერბაიჯანში ადვოკატს უთხრა, რომ ის ნაცემია.

საქართველოს შინაგან საქმეთა სამინისტრო ამბობს, რომ მათ გამოძიება ადამიანის თავისუფლების უკანონოდ აღკვეთის მუხლით დაიწყეს, თუმცა, ჯერ არ განუმარტავთ, როგორ აღმოჩნდა თბილისში დაკარგული ჟურნალისტი ბაქოს ციხეში. აფგან მუხტარლი ჯერ კიდევ რამდენიმე დღის წინ ამბობდა, რომ აზერბაიჯანის ხელისუფლების მიერ დევნილ პირებს საქართველოში საფრთხე ემუქრებათ, რადგან მათ თავშესაფარს არ აძლევენ და უკან, აზერბაიჯანში აბრუნებენ, სადაც წამება და მრავალწლიანი პატიმრობა ელოდებათ.

აფგან მუხტარლის აზერბაიჯანის პროკურატურამ სამი ბრალი წაუყენა, სასამართლომ კი ჟურნალისტს სამთვიანი წინასწარი პატიმრობა შეუფარდა.