ჯორჯიან უოთერ ენდ ფაუერის კამპანია "გაუფრთხილდი წყალს" თბილისის სკოლების მოსწავლეებისთვის განსხვავებული ფორმატით, ამჯერად სკოლებში გრძელდება. კამპანიის ფარგლებში ჯივიპის წარმომადგელები ეწვივენ თბილისის კლასიკურ გიმნაზიას, მწვანე სკოლას, N55-ე საჯარო სკოლასა და სკოლა მერმისს.

ფოტო: ჯორჯიან უოთერ ენდ ფაუერი

"ნაცვლად იმისა, რომ მოსწავლეები მოსულიყვნენ ჯივიპის სათავე ნაგებობაზე, ჩვენ ვართ სტუმრად მათ სკოლებში. მოსწავლეებს ვუყვებით, თუ როგორ ხდება გარემოდან წყლის მოპოვება, დამუშავება, სასმელი წყლის ხარისხის კონტროლი ჯივიპის ლაბორატორიებში. ისინი ეცნობიან სასმელი წყლის გაფრთხილების აუცილებლობას, მონაწილეობას იღებენ წყლის ხარისხის კონტროლის პრაქტიკულ ცდებში", — ამბობს სოფო ნატროშვილი, ჯორჯიან უოთერ ენდ ფაუერის საზოგადოებასთან ურთიერთობის დეპარტამენტის ხელმძღვანელი.

ფოტო: ჯორჯიან უოთერ ენდ ფაუერი

კამპანიის ფარგლებში სკოლებში მოსწავლეებმა გოგა ჩანადირთან ერთად ისაუბრეს, თუ რამდენად მნიშვნელოვანი როლი აქვს თითოეული მათგანის ჩართულობას გარემოზე ზრუნვასა და გაფრთხილებაში.

ფოტო: ჯორჯიან უოთერ ენდ ფაუერი

"გარემოსდაცვითი საკითხების მიმართ ცნობიერების ამაღლება ძალიან მნიშვნელოვანია, რისთვისაც აუცილებელია სკოლის მოსწავლეებთან ხშირი შეხვედრა და საუბარი. ვფიქრობ, რომ პასუხისმგებლობას, რასაც ჰქვია გარემოზე ზრუნვა და სასმელი წყლის გაფრთხილება, ბავშვობიდან უნდა მივეჩვიოთ. ვისურვებდი, რომ ბევრი ახალგაზრდა ჩაერთოს კამპანიაში "გაუფრთხილდი წყალს" და მიღებული ცოდნა გაუზიარონ სხვებს", — ამბობს გოგა ჩანადირი, სამოქალაქო აქტივისტი.