ბულგარეთში თურქეთის ტერაქტთან დაკავშირებული 5 პირის დაკავების შესახებ ინფორმაცია საერთაშორისო მედიამ გაავრცელა.

რატომ არის მნიშვნელოვანი: 13 ნოემბერს, სტამბოლის ცენტრში, ისტიკლალის გამზირზე აფეთქება მოხდა, რის შედეგადაც 6 ადამიანი დაიღუპა, 80-ზე მეტი კი დაშავდა.

  • პირველადი ცნობების მიხედვით, ვარაუდობდნენ, რომ ეს ტერორისტული აქტი იყო.
  • თურქეთის შინაგან საქმეთა მინისტრი, სულეიმან სოული აფეთქებაში სეპარატისტ ქურთებს, კერძოდ, ქურთისტანის მუშათა პარტიასა და სირიაში მოქმედ სახალხო დაცვის შენაერთებს ადანაშაულებს, თუმცა თავდასხმაზე პასუხისმგებლობა ჯერ არცერთ დაჯგუფებას არ აუღია.

დეტალები: ბულგარეთის მთავარი პროკურორის, ივან გეშევის განცხადებით, დაკავებულებს შორის მოლდოვის სამი მოქალაქე და ორი სირიელი ქურთია.

  • მათ ბრალად ტერაქტის ორგანიზებაში დახმარება და ადამიანებით ვაჭრობა ედებათ.
  • გეშევის განცხადებით, თურქეთის ხელისუფლებამ ბულგარეთს ეჭვმიტანილების ექსტრადირების თხოვნით უკვე მიმართა.