თბილისის საქალაქო სასამართლო აცხადებს, რომ ბრალდებულ გიორგი მამალაძის საქმის არსებითი განხილვა ცხრა ივნისს 13 საათზე გადაიდო. ხოლო, დახურულ სხდომაზე სახალხო დამცველის დასწრების საკითხზე სასამართლო მომდევნო სხდომაზე იმსჯელებს.

სახალხო დამცველმა მამალაძის სისხლის სამართლის საქმის სხდომაზე დასწრებისა და მონიტორინგის განხორციელების სურვილი დღეს გამოთქვა.

დღევანდელი სხდომა სახაზინო წესით დანიშნული ადვოკატების შუამდგომლობით გადაიდო. მათ მოითხოვეს დრო საქმის მასალების გასაცნობად.

საქალაქო სასამართლოს განცხადებით, მომდევნო სხდომისათვის სახალხო დამცველმა და მხარეებმა სასამართლოს უნდა წარუდგინონ არგუმენტირებული და სამართლებრივად დასაბუთებული შუამდგომლობა სახალხო დამცველის დახურულ სასამართლო სხდომაზე დასწრების შესაძლებლობასთან დაკავშირებით.

19 მაისს, სასამართლოში მამალაძის საქმის განხილვა სრულად დაიხურა. გადაწყვეტილება საქმის განმხილველმა მოსამართლემ ბესიკ ბუგიანიშვილმა მიიღო. ამით მან პროკურატურის შუამდგომლობა გაიზიარა.

თბილისის საქალაქო სასამართლომ იმავე დღეს ე.წ. ციანიდის საქმის სხდომასთან დაკავშირებით, განცხადება გაავრცელა, სადაც ნათქვამია, რომ ბრალდებულის უფლებებს, მომდევნო სხდომაზე სახაზინო წესით დანიშნული ადვოკატი დაიცავდა.