ლატარიის მოგება ალბათ ყველა ჩვენგანის ოცნებაა, თუმცა, როგორც წესი, იშვიათ ადამიანებს უმართლებთ და უსრულდებათ რეალობაში ეს ნატვრა. დელავერში კი ქალმა არათუ ერთხელ, არამედ ორჯერ შეძლო ზედიზედ მოგება და ჯამში $400 000 მიიღო.

მისი სახელი საჯაროდ ცნობილი არაა, ვინაიდან დელავერში კანონის თანახმად, ადამიანებს, რომლებიც ლატარიას იგებენ, აქვთ უფლება საზოგადოებისთვის ანონიმური დარჩნენ.

დელავერის ლატარიის წარმომადგენლებმა განაცხადეს რომ 20 ოქტომბერს მომგებიანი ბილეთის მფლობელი ქალი და მისი მეგობარი მათ სათავო ოფისში მივიდნენ და მოგებული $100 000 მოითხოვეს. ქალს ეს ბილეთი ბენზინგასამართ სადგურზე ქალაქ ნევარკში ჰქონდა ნაყიდი.

მოგებული თანხის მიღების შემდეგ კი, როცა სახლში ბრუნდებოდა, ლატარიის გამარჯვებულმა კიდევ სამი ახალი ბილეთი შეიძინა, რომელთაგან ერთ-ერთი ისევ მომგებიანი აღმოჩნდა და მას დამატებით $300 000 მოაგებინა.

"გაოგნებულები ვისხედით,"— განაცხადა ქალმა, რომელმაც ზედიზედ ორჯერ მოიგო. — "ნამდვილი სიგიჟე იყო."

იგი იმავე დღეს დაბრუნდა ლატარიის სათავო ოფისში, რათა მოგებული $300 000-იც მიეღო.

ლატარიის დირექტორის, ჰელენ კილის, განცხადებით კი, მათ ძალიან უხარიათ, როცა მოთამაშეები ექვსნიშნა თანხებს იგებენ.