NASA/ESA ჰაბლის კოსმოსური ტელესკოპის ამ სურათზე ჩანს ორი გალაქტიკა გალაქტიკურ ტრიპლეტ Arp 248-ში, იგივე — Wild's Triplet-ში. Arp 248 მდებარეობს დედამიწიდან დაახლოებით 200 მილიონი სინათლის წლის მანძილზე, ქალწულის თანავარსკვლავედში. ამ სურათზე ხილული ორი დიდი სპირალური გალაქტიკა, როგორც ჩანს, დაკავშირებულია მანათობელი "ხიდით". მოქცევის კუდის სახელით ცნობილი ვარსკვლავებისა და ვარსკვლავთშორისი მტვრის ეს წაგრძელებული ნაკადი წარმოიქმნა ორი გალაქტიკის ორმხრივი გრავიტაციული მიზიდულობით.

ეს დაკვირვება მომდინარეობს პროექტიდან, რომელიც შეისწავლის უცნაური და მშვენიერი გალაქტიკების გალერეას: A Catalogue of Southern Peculiar Galaxies and Associations-სა და Atlas of Peculiar Galaxies-ის. თითოეული კოლექცია მოიცავს კატალოგს უჩვეულო გალაქტიკებისა, როგორებიცაა: Arp 248-ს მსგავსი ინტერაქტიური გალაქტიკები, ერთ ან სამმკლავიანი სპირალური გალაქტიკები, ნიჟარის მსგავსი სტრუქტურის მქონე გალაქტიკები და სხვა კოსმოსური უცნაურობები.

ჰაბლმა გამოიყენა თავისი Advanced Camera for Surveys (ACS), რათა დაკვირვებოდა უცნაურ გალაქტიკებს და მოეძიებინა პერსპექტიული კანდიდატურები შემდგომი კვლევებისთვის, რომლებიც თავად ჰაბლით, ჯეიმს ვების კოსმოსური ტელესკოპითა და Atacama Large Millimeter/submillimeter Array-ით ჩატარდება. ასეთი პროექტები, რომლებიც სამომავლო კვლევებისთვის ღამის ცის ობიექტებს შეისწავლის, დროზე დაკვირვების ღირებული ინვესტიციაა. ეს უცნაური გალაქტიკები შეირჩა არა მხოლოდ სამეცნიერო მიზნებისთვის, არამედ საზოგადოებისთვის მათი ვიზუალური მიმზიდველობის გამოც.