ბიჭვინთის ერთ-ერთი მაღაზიიდან ხაშის 38 კონსერვის ამოღებაზე ინფორმაცია ოკუპირებული აფხაზეთის ე.წ. საბაჟო კომიტეტმა 23 ოქტომბერს გაავრცელა.

რატომ არის მნიშვნელოვანი: საუბარია პროდუქციაზე, რომლის ეტიკეტზეც საქართველოს დროშა და რუკა იყო გამოსახული, სადაც აფხაზეთი საქართველოს შემადგენლობაშია.

  • ასევე, გამოძიება მიმდინარეობდა მე-7 კლასის გეოგრაფიის ატლასზე გამოსახული საქართველოს დროშის საქმეზეც.

დეტალები: დე ფაქტო პროკურატურა ირწმუნება, რომ საქართველოს რუკიანი პროდუქცია ოკუპირებული აფხაზეთის ტერიტორიაზე "საბაჟო კანონმდებლობის" დარღვევით მოხვდა.

  • მათივე ინფორმაციით, მაღაზიებიდან ამოიღეს ხაშისა და რუბეცის 74 კონსერვის ქილა.
  • ქართული მინერალური წყლების — ბორჯომის, ნაბეღლავის, ლიკანისა და საირმის 11 ბოთლი.
  • 8 პაკეტი რუსული წარმოების ორცხობილა, რომლის იმპორტიორიც თბილისიდან ქართული კომპანია ორბიტა იყო.
  • დე ფაქტო პროკურატურის განცხადებით, პროდუქცია სოხუმის, გუდაუთის, გაგრის, ოჩამჩირისა და გულრიფშის მაღაზიებში იყიდებოდა

გარდა ამისა, დე ფაქტო რეჟიმის თქმით, "გამოავლინეს საქართველოს დროშიანი 13 ერთეული გეოგრაფიის ატლასის გამოყენების ფაქტიც".

  • "აფხაზეთის რესპუბლიკის განათლებისა და ენის პოლიტიკის სამინისტროსთვის შეთავაზებულია ამ სახელმძღვანელოების ჩანაცვლება გეოგრაფიის მასწავლებელთა მეთოდური ასოციაციის მიერ რეკომენდებული სახელმძღვანელოებით", – ნათქვამია განცხადებაში.