ბიჭვინთის ერთ-ერთი მაღაზიიდან ხაშის 38 კონსერვის ამოღებაზე ინფორმაცია ოკუპირებული აფხაზეთის ე.წ. საბაჟო კომიტეტმა გაავრცელა.

რატომ არის მნიშვნელოვანი: საუბარია პროდუქციაზე, რომლის ეტიკეტზეც საქართველოს დროშა და რუკა იყო გამოსახული, სადაც აფხაზეთი საქართველოს შემადგენლობაშია.

  • აფხაზეთის დე ფაქტო პროკურატურა, რომელსაც ფაქტის გამოძიება დაევალა, ვერ აკონკრეტებს, რა დარღვევაზეა საუბარი.

დეტალები: ინფორმაცია იმის შესახებ, რომ ბიჭვინთის ერთ-ერთ სასურსათო მაღაზიაში საქართველოს რუკისა და დროშის გამოსახულებით კონსერვები იყიდებოდა, აფხაზურ ტელეგრამ არხებზე გასული კვირის ბოლოს გავრცელდა.

  • საქმეზე გამოძიება ე.წ. კონტრაბანდისა და საბაჟო სამართალდარღვევათა წინააღმდეგ ბრძოლის დეპარტამენტის თანამშრომლებმა 23 ოქტომბერს დაიწყეს.
  • მათივე თქმით, კონსერვები ოკუპირებული აფხაზეთის ტერიტორიაზე კანონმდებლობის დარღვევით მოხვდა.
  • სოციალურ ქსელებში გავრცელებული ინფორმაციის თანახმად, "ხაშის" კონსერვები არა საქართველოში, არამედ სტავროპოლის მხარეშია დამზადებული.

გარდა ამისა, ეხო კავკაზას ინფორმაციით, აფხაზეთის დე ფაქტო რესპუბლიკაში ქართულ ღვინოებზე, ასევე, მე-7 კლასის გეოგრაფიის ატლასზე გამოსახული საქართველოს დროშის საქმესაც იძიებენ.