საქართველოს შინაგან საქმეთა სამინისტროს გურიის პოლიციის დეპარტამენტის ლანჩხუთის რაიონული სამმართველოს თანამშრომლებმა ოთხი აბი "სუბოქსინის" შეძენა-შენახვის და გადაზიდვის ბრალდებით ერთი პირი დააკავა.

შსს-ს ინფორმაციით, სამართალდამცველების მიერ, დაკავებულის პირადი ჩხრეკისას, ამოღებული „სუბოქსინი“ "ბუპრენორფინს" შეიცავს.

"ნარკოლოგიური შემოწმების შედეგად დადგინდა, რომ დაკავებისას ნარკოტიკული საშუალების ზემოქმედების ქვეშ იმყოფებოდა. ბრალდებული ჩადენილ დანაშაულს აღიარებს," - აღნიშნავენ შსს-ში.

გამოძიება სისხლის სამართლის კოდექსის 260-ე მუხლის მესამე ნაწილის "ა" ქვეპუნქტით მიმდინარეობს. ამ მუხლით, დიდი ოდენობით ახალი ფსიქოაქტიური ნივთიერების უკანონო დამზადება, წარმოება, შეძენა, შენახვა, გადაზიდვა ან გადაგზავნა ისჯება თავისუფლების აღკვეთით ვადით ხუთიდან რვა წლამდე.