სექტემბრის თვეში კარდაშიანების ახალი რეალითი შოუს მეორე სეზონი დაიწყო. ამერიკული პოპკულტურის ერთ-ერთი ყველაზე ცნობილი და გავლენიანი ოჯახის ყოველდღიურობის შესახებ შექმნილ შოუში მაყურებელს კარდაშიან-ჯენერებზე უამრავი უცნაური და დაუჯერებელი ამბავი გაუგია.

აი, ცოტა ხნის წინ გამოსული ეპიზოდიდან შევიტყვეთ, რომ კიმ კარდაშიანს დედამისის ოპერაციის დროს მისი ძვლების სამკაულების დასამზადებლად გადანახვა უთხოვია. ამის შესახებ თავად კრის ჯენერმა განუცხადა ქლოისა და კაილის.

"კიმმა ექიმს სთხოვა, ჩემი რამდენიმე ძვალი გადაედო, რათა მათგან სამკაული დაემზადებინა", — ჰყვება ჯენერი, — "რა საშინელებაა".

კიმი დედამისს კრისის პარტნიორთან ერთად ახლდა საავადმყოფოში ოპერაციის ჩატარებისას. კარდაშიანმა სასხვათაშორისოდ აღნიშნა, რომ ერთგვარი ტრადიციაა აქვს — როცა მისი ოჯახის წევრებს ოპერაციას უკეთებენ, იგი ექიმებს ემუქრება.

აღსანიშნავია, რომ რეალითი შოუსთვის ოპერაციის კადრებიც გადაიღეს. ეს კი სულაც არაა გასაკვირი იმის გათვალისწინებით, კორტნი კარდაშიანმა თავის დროზე კამერების თანდასწრებით იმშობიარა.

მართალია, კიმის განზრახვა კრისს საშინელებად ეჩვენა, მაგრამ ჯენერმა წინათ განაცხადა, რომ სურს, გარდაცვალების შემდეგ მის სხეულს კრემაცია ჩაუტარდეს, ფერფლით კი შვილებისთვის სამკაულები დაამზადონ.

"ერთმანეთს ვეუბნებით ხოლმე, რას ვისურვებდით, რამე საშინელება თუ მოხდა", — ამბობს ქლოი, — "თუკი კომაში აღმოვჩნდი, მანიკურს ყოველკვირა მაინც გამიკეთებენ. ეს ანდერძშიც მიწერია, ადამიანები ხომ ჩემს სანახავად მოვლენ".

ფოტო: Hulu

კარდაშიანების ოჯახი მსოფლიომ 2007 წელს გაიცნო, როცა მათ ყოველდღიურ ცხოვრებაზე გადაღებული რეალითი შოუ დაიწყო. შოუს ძირითადი ხაზი ოჯახის ექვსი წევრის გარშემო ვითარდება — კორტნი, კიმ და ქლოი კარდაშიანები, კენდალ და კაილი ჯენერები და ასევე მათი დედა, კრის ჯენერი. პოპკულტურის ცნობადმა სახეებმა მოგვიანებით არაერთი ბრენდიც დააფუძნეს, რის შედეგადაც ყველა მათგანი მილიონერი გახდა; კიმ კარდაშიანი და კაილი ჯენერი კი შემდგომ მილიარდერებადაც იქცნენ.