ვოლოდიმირ ზელენსკისთან Zoom-ის შეხვედრის შემდეგ მსახიობი მარკ ჰემილი ინიციატივა United24-ს შეუერთდა, რომლის მიზანიც უკრაინის სამხედრო დრონებით აღჭურვაა. ჰემილის ტვიტერის პოსტიდან ვიგებთ, რომ მსახიობის დახმარებით უკრაინას 500 დრონი გადაეცემა.

"ყველაფერი ძალიან მარტივადაა: უკრაინას დრონები სჭირდება, რადგან ეს ომის შედეგებს განსაზღვრავს. უკრაინელები თავიანთ მიწასა და ხალხს იცავენ, აკონტროლებენ საზღვრებს და ცას უყურებენ", — განაცხადა ჰემილმა და ისიც აღნიშნა, რომ უკრაინას 500 დრონი გადაეცემა.

ლუკ სკაიუოკერის როლის შემსრულებელმა უკრაინის მიმართ მხარდაჭერა უკვე არაერთხელ გამოხატა. ოქტომბრის დასაწყისში მსახიობმა ტვიტერზე ფოტო გამოაქვეყნა, რომელშიც ვარსკვლავური ომებიდან X-wing Starfighter-ს უკრაინის დროშის ფერებში ვხედავთ და ის ბოროტების იმპერიის წინააღმდეგაა მიმართული.

"მე ფილმებში გმირის როლს ვთამაშობ, თქვენ კი ნამდვილი გმირები ხართ", — განაცხადა ჰემილმა უკრაინელების შესახებ ერთ-ერთ ინტერვიუში. შეგახსენებთ, რომ ინიციატივა United24-ს ლივ შრაიბერი და ბარბარა სტრეიზანდი შეუერთდნენ, რათა უკრაინელების სამედიცინო დახმარებისთვის საჭირო თანხები შეაგროვონ.