ქართული ოცნების თავმჯდომარემ ამ საკითხზე პირველი კომენტარი გააკეთა.

დეტალები: მან კვლავინდებურად ომში ჩართვის "მცდელობებზე" ისაუბრა და ეს საკითხიც ამ ნარატივს დაუკავშირა.

• TV პირველის კითხვაზე, რატომ ვერ მოახერხა ქართულმა ოცნებამ ამ სანქციების თავიდან არიდება, ამბობს — "მეორე ფრონტი არ გავხსენით".

კობახიძის მტკიცებით, უკრაინის უსაფრთხოების სამსახურის უფროსი, ალექსეი დანილოვი ერთი მხრივ, საქართველოს მეორე ფრონტის გახსნისკენ მოუწოდებს, მეორე მხრივ, კი აშანტაჟებს.

• კითხვაზე, თუ როგორ აპირებენ პარტიის დამფუძნებლის დაცვას, კობახიძე ამბობს: "არ სჭირდება მას დაცვა, მეორე ფრონტი არ იქნება საქართველოში".
• "ვერც დანილოვი, და ვერც სხვები ამას ვერ მიაღწევენ", — დაამატა მან.

რატომ არის მნიშვნელოვანი: უკრაინამ ბიძინა ივანიშვილის ნათესავები, მათ შორის მისი ძმა და უჩა მამაცაშვილი დაასანქცირა.

• შესაბამისი ბრძანება გუშინ, 19 ოქტომბერს უკრაინის პრეზიდენტის ადმინისტრაციის ვებგვერდზე გამოქვეყნდა და პერსონალური სპეციალური ეკონომიკური და სხვა შემზღუდავი ზომების (სანქციების) სიაში ცვლილებების შეტანას ითვალისწინებს.
• ბრძანებას თან ახლავს დოკუმენტი სახელად "დამატება", სადაც ჩამოთვლილია სანქცირებული პირების სახელები და აღნიშნულია, რომ დოკუმენტი ძალაში შევიდა.
• სანქცირებულთა სიაში არიან ქართული ოცნების დამფუძნებლის ძმა ალექსანდრე ივანიშვილი და ალექსანდრეს ცოლი ქეთევან ხარაზიშვილი.
• ასევე, ბიძინა ივანიშვილის დეიდაშვილი, უჩა მამაცაშვილი და მისი შვილი, ტიტე მამაცაშვილი.

რა სანქციები დაუწესდათ: თითოეულ პირს ახლავს მოკლე დახასიათება და მისთვის დაწესებული შეზღუდვების სია, რომლებშიც აღნიშნულია, რომ დაებლოკებათ აქტივები და დროებით წაერთმევათ მათ საკუთრებაში არსებული აქტივების გამოყენებისა და განკარგვის უფლება.

• ასევე იგულისხმება უკრაინის ტერიტორიაზე რესურსების ტრანზიტის, ფრენების და ტრანსპორტირების შეზღუდვა, ნაწილობრივი ან სრული შეწყვეტა;
• ეკონომიკური და ფინანსური ვალდებულებების შესრულების შეჩერება;
• ლიცენზიებისა და სხვა ნებართვების გაუქმება ან შეჩერება.

კონტექსტი: უკრაინაში ომის დაწყების შემდეგ სანქციებთან მიმართებაში ბიძინა ივანიშვილისა და მისი გარემოცვის სახელი არაერთხელ გაჟღერდა, თუმცა არცერთ ქვეყანას ამ მიმართულებით ნაბიჯები არ გადაუდგამს.

• ოპოზიცია და საერთაშორისო პარტნიორები, მათ შორის უკრაინის ხელისუფლებიდან და ევროპარლამენტიდან, ამის აუცილებლობაზე საუბრობდნენ.
• 5 სექტემბერს უკრაინის საგარეო საქმეთა სამინისტროსა და ანტიკორუფციული სააგენტოს მხარდაჭერით შექმნილ პლატფორმაზე გამოჩნდა ივანიშვილისა და 11 ქართველის, მათ შორის მისი ოჯახის წევრებისა და გარემოცვის სახელები, რამაც შექმნა მოლოდინი, რომ, შესაძლოა, სანქციები დაუწესდეთ.
• მაშინ დავით არახამიამ განაცხადა, რომ პაკეტში ჯერჯერობით ივანიშვილის პოლიტიკური გარემოცვის წევრები არ არიან და ეს შემთხვევითობა არ არის, რადგან ამ ეტაპზე ფიქრობენ, რომ მხოლოდ ოლიგარქისა და მისი დამფინანსებელი წყაროების წინააღმდეგ უნდა იმოქმედონ.

ვინ იყო სიაში: ბიძინა ერთადერთი ივანიშვილი არ არის, ვის გვარსაც ამ პლატფორმაზე ნახავდით. აქვე იყო მისი ძმა, ალექსანდრე ივანიშვილიც.

• გარდა ამისა, ქართული ოცნების დამფუძნებლის ნათესავები უჩა და ტიტე მამაცაშვილები, ქეთევან ხარაიძე და მათი პარტნიორი გიორგი კაპანაძე;
• ასევე, თავად ივანიშვილის პარტნიორი, ირაკლი რუხაძე;
• აქვე ნახავდით ბიზნესმენებს, დავით ხიდაშელს, ლევან ვასაძეს, ვანო ჩხარტიშვილს;
• და ყოფილ მაღალჩინოსნებს, ოთარ ფარცხალაძეს, სულხან პაპაშვილს.

რატომ ითხოვდნენ მათ სანქცირებას: პლატფორმაზე ყველა პირის შესახებ მოკლე დახასიათებაა წერია, სადაც სიაში შეყვანის აუცილებლობაა განმარტებული.

• მაგალითად, ჰომოფობი და მოძალადე ჯგუფების ლიდერი, წარსულში რუსეთში მოღვაწე ბიზნესმენი, ლევან ვასაძე აღწერილია, როგორც პუტინის პროპაგანდისტის, ალექსანდრ დუგინის ახლო მოკავშირე;
• ყოფილი გენერალური პროკურორი, ოთარ ფარცხალაძე ოლიგარქიული მმართველობის და ივანიშვილის მიერ სახელმწიფოს მიტაცების ერთ-ერთ მონაწილედაა დახასიათებული;
• დავით ხიდაშელი კი ივანიშვილის პარტნიორად და ბიზნესმენად, რომლის კომპანიების შემოსავალი აძლიერებს რუსეთის ბიუჯეტს.

რას წერენ ივანიშვილზე: მის დახასიათებაში ვკითხულობთ, რომ საქართველოს არაფორმალური მმართველია და ახლო კავშირები აქვს რუსულ პოლიტიკურ ელიტასთან.

• ნათქვამია, რომ ეხმარებოდა რუს ოლიგარქ ვლადიმერ ევტუშენკოვს სანქციებზე თავის არიდებაში;
• ასევე, ბიზნესინტერესები აქვს სანქტ-პეტერბურგის სანქცირებულ გუბერნატორსა და მოსკოვის დუმის დეპუტატთან.