ლაშა ხუციშვილი ამ განცხადებით პრეზიდენტ ზურაბიშვილს გამოეხმაურა, რომელმაც დღეს თქვა, რომ რუსეთთან სავიზო რეჟიმი საკმაოდ ლიბერალურია და არ არის გამორიცხული, მისი გადახედვა მოგვიწიოს.

რატომ არის მნიშვნელოვანი: მას შემდეგ, რაც რუსეთში მობილიზაცია გამოცხადდა, მოქალაქეები ოკუპანტი ქვეყნის დატოვებას მასობრივად ცდილობენ.

  • მათი ნაწილი საქართველოში ჩამოდის — ლარსის გამშვებ პუნქტთან მობილიზაციის გამოცხადების შემდეგ რამდენიმეკილომეტრიანი საცობები იყო.
  • რუსეთის მოქალაქეებისთვის შეზღუდვების დაწესების მოთხოვნით საქართველოში პეტიციაც შეიქმნა.
  • ორგანიზატორები ხელისუფლებას მოუწოდებდნენ, დაუყოვნებლივ შემოიღოს სავიზო რეჟიმი რუსეთთან.

დეტალები: "დღეს არსებული კონტროლის მექანიზმები სრულად პასუხობს იმ გამოწვევებს, რა გამოწვევებიც ქვეყანას აქვს და შესაბამისად, ამ ეტაპზე, ამის საჭიროებას მე პირადად ვერ ვხედავ", — განაცხადა ხუციშვილმა.

  • მინისტრის თქმით, თუ შეიქმნება სიტუაცია, როცა კონტროლის მექანიზმები ვერ უზრუნველყოფენ ქვეყანაში აუცილებელ უსაფრთხოების სტანდარტს, მაშინ შეიძლება სავიზო რეჟიმის დაწესებაზე საუბარი.

სალომე ზურაბიშვილმა მოლდოვის პრეზიდენტთან ერთად გამართულ ბრიფინგზე თქვა, რომ სავიზო რეჟიმის დაწესების საკითხი ხელისუფლებამ საზოგადოებასთან ერთად უნდა გადაწყვიტოს.

  • "გამორიცხული არ არის, რომ მოგვიწიოს გადახედვა სავიზო რეჟიმის, რომელიც არის საკმაოდ ლიბერალური დღევანდელ პირობებში და რომელიც შეიძლება, ამ აგრესიის პირობებში ნაკლებად მისაღები იყოს, მაგრამ ეს ყველაფერი არის გადასაწყვეტი ხელისუფლების მიერ და საზოგადოებასთან ერთად და მისი ინფორმირებით", — განაცხადა პრეზიდენტმა.
  • მისი თქმით, რუსეთის მოქალაქეების ჩამოსვლა საქართველოში ნამდვილად არის გამოწვევა და საზოგადოება დარწმუნებული უნდა იყოს, რომ კონტროლის ყველა მექანიზმი სათანადოდ მუშაობს.
  • "ამისთვის მეტი კომუნიკაცია, მეტი ინფორმირებაა საჭირო ჩვენი საზოგადოების, რომ ყველა შესაძლო საფრთხე და საკითხი არის რეალურად გათვალისწინებული ხელისუფლების მიერ და ყველა ზომა მიღებული", — თქვა ზურაბიშვილმა.