ამ კითხვით On.ge-მ მერიის პრესსამსახურს მიმართა.

რატომ არის მნიშვნელოვანი: დღეს ვაკის პარკში მომხდარი უბედური შემთხვევის შემდეგ თბილისის მერიამ ჯერ ფეისბუქგვერდიდან, შემდეგ კი ოფიციალური ვებგვერდიდან წაშალა განცხადებები და ფოტო-მასალა შადრევნის გახსნის შესახებ.

  • ორივე მათგანში ეწერა: "ვაკის პარკში არსებული მცირე კასკადისა და მრგვალი შადრევნის რეაბილიტაცია დასრულდა".

ფოტო: კადრები ვებგვერდიდან

სტრიქონებს შორის: ამას დაემატა ისიც, რომ ქართული ოცნების დეპუტატმა, გიორგი ამილახვარმა უბედურ შემთხვევაზე საუბრისას სცადა, პასუხისმგებლობა მოზარდების მეთვალყურეებზე გადაეტანა და ამტკიცებდა, რომ ჯერ კიდევ შადრევნის რეკონსტრუქცია მიმდინარეობდა.

  • საზოგადოებაში გაჩნდა მოსაზრება, რომ მერია ცდილობდა პასუხისმგებლობა აერიდებინა, დაემალა და სწორედ ამიტომ წაშალა პოსტი იმაზე, რომ შადრევნის რეაბილიტაცია დასრულდა.
  • მოგვიანებით, ამილახვარმა ბოდიში მოიხადა თავისი სიტყვების გამო და განმარტა, რომ არ ჰქონდა საკმარისი ინფორმაცია, მათ შორის, არც შადრევნის გახსნაზე.

მერიაში ამბობენ, რომ გუშინდელი ფოტომასალის და ინფორმაციის აღება "მიზანშეწონილად მიიჩნიეს ვაკის პარკში მომხდარი ტრაგიკული შემთხვევის გამო".

  • "რაც არის ერთგვარი პოზიცია ამ შემზარავი ფაქტის მიმართ. მთელი გულით ვუცხადებთ სამძიმარს გარდაცვლილის ოჯახს!" — ამბობენ უწყებაში.

რა ეწერა მერიის პოსტში: უწყებაში On.ge-ის განუცხადეს ისიც, რომ ფეისბუქზეც და ვებზეც გამოქვეყნებული იყო ის ინფორმაცია, რაც მედიებს ელექტრონულ ფოსტაზე დაგვეგზავნა.

  • პრესრელიზში წერდნენ, რომ მერიის გარემოს დაცვის საქალაქო სამსახურმა მცირე კასკადისა და მრგვალი შადრევნის რეაბილიტაცია დაასრულა და დასრულებულ სამუშაოებს დედაქალაქის მერი საკრებულოს თავმჯდომარესთან, დეპუტატებთან და სხვა ოფიციალურ პირებთან ერთად გაეცნო.

  • უწყების განცხადებით, რეაბილიტაციის ფარგლებში, მთლიანად შეიცვალა წყალმომარაგების სისტემა. დამონტაჟდა თანამედროვე ტექნოლოგია, რომელიც ავტომატიზებულია, ასევე, მოეწყო განათების სისტემა.

  • მათვე განაცხადეს, რომ მცირე კასკადისა და მრგვალი შადრევნის სარეაბილიტაციო სამუშაოების ღირებულება 6 500 000 ლარია — ჯამში, ვაკის პარკის განახლების პროექტი, გამწვანებისა და ინფრასტრუქტურული სამუშაობის ჩათვლით, 33 000 000 ლარს შეადგენს.