თბილისის სახელმწიფო უნივერსიტეტის გენდერის ინსტიტუტის ხელმძღვანელის, თამარ საბედაშვილის ინფორმაციით, უნივერსიტეტში ლგბტ საკითხებზე კონფერენცია იმიტომ ჩაიშალა, რომ მათ მუქარის შემდეგ შინაგან საქმეთა სამინისტროს მობილიზება ვერ შეძლეს.

22 თებერვალს თბილისის სახელმწიფო უნივერსიტეტში უნდა გამართულიყო პრეზენტაცია, თემაზე გენდერისა და სექსუალობის საკითხებზე სტუდენტების მგრძნობელობის გაზრდა. პროექტს კანადის მთავრობა უჭერდა მხარს.

როგორც კონფერენციის ორგანიზატორმა და თსუს გენდერის ინსტიტუტის ხელმძღვანელმა თამარ საბედაშვილმა On.ge-სთან საუბარში თქვა, სტუდენტური კონფერენციის ჩაშლას წინ უძღოდა ორგანიზაცია თავისუფალი თაობისა და გიორგი გაბედავას მიერ ობიექტივის ეთერში კონფერენციის პარალელურად მისი საწინააღმდეგო აქცია დაანონსება. გაბედავას თქმით, ამის მიზეზი "იდენტობის მიერ ლგბტ თემის პროპაგანდისგან საქართველოს დაცვა იყო". გაბედავა და მისი თანამოაზრეები ფეისბუქზე მუქარასა და ჰომოფობიურ განცხადებებს ავრცელებდნენ.

"გვსურდა სტუდენტებისთვის და პრესკონფერენციაზე გამომსვლელებისათვის აგვერიდებინა ნებისმიერი სახის გაუგებრობა და ინციდენტი. მოგეხსენებათ, რომ თსუს დაცვა ვერ შეძლებდა სიტუაციის განმუხტვას, ის ვერ შეძლებს ასეთი სახის საწინააღმდეგო აქციები შეაკავოს. მე ქალაქში არ ვიმყოფები და არ მქონდა საკმარისი დრო, რომ შინაგან საქმეთა სამინისტრო და სამართალდამცავები ჩამერთო და სიტუაციის მობილიზება მომხდარიყო. არ ველოდი, რომ ეს კონფერენცია ასეთ აჟიოტაჟს გამოიწვევდა" - გვითხრა თამარ საბედაშვილმა.

მან აღნიშნა, რომ სტუდენტური პრესკონფერენცია არ ჩაშლილა და ის უბრალოდ გადაიდო. თამარ საბედაშვილის თქმით, სტუდენტური კონფერენცია მარტის ბოლოს გაიმართება და მასში ორგანიზაცია იდენტობა მონაწილეობას აღარ მიიღებს.

"ეს კონფერენცია გაიმართება, თუმცა იდენტობის ნაწილი რაც იყო ლგბტ საკითხებზე, ის უკვე გაიმართა დღეს იდენტობის ოფისში, მათ უკვე შეასრულეს დღის წესრიგი და მომავალ პრესკონფერენციაში მონაწილეობას აღარ მიიღებენ" - დასძინა გენდერის ინსტიტუტის ხელმძღვანელმა.

იდენტობამ 22 თებერვალს თავის ოფისში ჩაატარა მეოთხე ეროვნული სტუდენტური კონფერენცია, რომელიც მიზნად ისახავდა ტოლერანტული საზოგადოების ჩამოყალიბებასა და ლიბერალური ღირებულებების განმტკიცებას.