რუსეთში, ორლოვსკის ოლქის ეპისკოპოსმა საჩუქრად $106 500-ის ღირებულების Toyota Land Cruiser V8 მიიღო, რის გამოც კრიტიკაც დაიმსახურა, თუმცა, ჟურნალისტებთან გადაწყვეტილება მისმა წარმომადგენელმა ასე განმარტა: "იესო ქრისტეც ატარებდა ძვირფას ტანსაცმელს, რომელსაც მას მიმდევრები ჩუქნიდნენ". ინფორმაციას რუსული მედიასაშუალება Open Russia ავრცელებს.

თავდაპირველად, ჟურნალისტებს ეპარქიაში განუცხადეს, რომ მიტროპოლიტმა ნეკტარიმ ძვირფასი ავტომობილი თავად შეიძინა, მოგვიანებით კი თავად სასულიერო პირმა განმარტა, რომ ეს საჩუქარია. Open Russia-ს ცნობით, ავტომობილს ელიტური ნომერიც, А008ОО57RUS, შეურჩიეს, რომლითაც მხოლოდ ადგილობრივი მთავრობის წარმომადგენლები დადიან.

ეპარქიის წარმომადგენელმა ჟურნალისტებს უთხრა, რომ ძვირფასი საჩუქარი ეპისკოპოსმა ადგილობრივი კომპანიისგან მიიღო, ძვირფასი საჩუქრების მიღებას კი ქრისტეც არ თაკილობდა:

"არაერთი წმინდანი აკეთებდა იგივეს. მაგალითად, იოანე კრონშნდატსკი ასევე იღებდა საჩუქრად ძვირფას სამოსელს, ავტომობილებს, გემებს და ა.შ. ეს არანაირად არ წარმოადგენს ადამიანის სულიერი ცხოვრების ხასიათს, თუ ეს ადამიანი ემსახურება საზოგადოებას, ამ შემთხვევაში როგორც ეპისკოპოსი ნეკტარი აკეთებს ამას. მოდით, ნუ დავივიწყებთ მათი მუშაობის ტემპს, დაე ღმერთმა ამის გაძლების უნარი ჩვენც მოგვცეს. ამიტომ ასეთ საკითხებს ჯანსაღად უნდა მივუდგეთ და არ ჩავებღაუჭოთ. მოდით, ნუ მივალთ აბსურდამდე".

ორლოვსკის ოლქის ეპარქია არაერთხელ გამხდარა სკანდალის ეპიცენტრი სწორედ მსგავსი ძვირადღირებული ავტომობილების საჩუქრის მიღების გამო. რუსეთის მართლმადიდებელ ეკლესიაში ამ პრობლემის მასშტაბურობიდან გამომდინარე, პატრიარქმა კირილმა რამდენიმე წლის წინ სასულიერო პირებს ასეთი საჩუქრების მიღებისგან თავის შეკავებისკენ მოუწოდა, რადგან მისი თქმით, ეს აზიანებს ეკლესიის რეპუტაციას.