ამაზე აზერბაიჯანელმა ჟურნალისტმა პრესკონფერენციაზე ისაუბრა.

რატომ არის მნიშვნელოვანი: 26 ივლისს სახელმწიფო უსაფრთხოების სამსახურის ყოფილმა მაღალჩინოსანმა წერილი გაავრცელა, სადაც ნათქვამი იყო, რომ მუხთარლი ივანიშვილის დავალებით გაიტაცეს.

მუხთარლი აცხადებს, რომ ჩამოვიდა იმისათვის, რათა პროკურატურას რამდენიმე მოთხოვნა წაუყენოს.

  • პირველი მოთხოვნაა, რომ ვინაიდან სოსო გოგაშვილის განცხადებით, მის გატაცებაში ივანიშვილი და გომელაური მონაწილეობდნენ, ორივე მათგანი დაკითხონ;
  • ჟურნალისტის თქმით, აპირებს მიმართოს პრემიერმინისტრს, რომ შეუჩეროს შს მინისტრს უფლებამოსილება, რადგან თუ ის პოსტზე დარჩება, შეუძლია გამოძიებაზე გავლენა მოახდინოს;
  • "ხვალ ან ზეგ ჩემს ოფიციალურ მიმართვას მიიღებს პრემიერი და პარლამენტი", — აცხადებს ის. [TV პირველის თარგმანი]

არქივიდან: აფგან მუხთარლი 2017 წელს თბილისის ცენტრიდან გაუჩინარდა და მეორე დღეს მოულოდნელად აზერბაიჯანის ციხეში აღმოჩნდა.

  • იგი ამბობს, რომ საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს.
  • მუხთარლის აზერბაიჯანში 6-წლიანი პატიმრობა მიუსაჯეს, საერთაშორისო ადამიანის უფლებადამცველმა ორგანიზაციებმა იგი პოლიტიკურ პატიმრად აღიარეს.

გოგაშვილის თქმით, აფგან მუხთარლი სუს-ის თანამშრომლებმა გაიტაცეს და კადრები ე.წ. ოტომ წაშალა.

  • ის ოპერატიულ-ტექნიკურმა დეპარტამენტის მიერ შს მინისტრის ყოფილი მოადგილის, გელა ხვედელიძის ცემის ფაქტების "გაქრობაზეც" საუბრობ.ს
  • გოგაშვილი ამბობს, რომ ხვედელიძეს "ტელეფონზე ბიძინას გინების გამო" ფარცხალაძის "ბანდამ" სცემა.

აფგან მუხთარლი გოგაშვილის განცხადებას გამოეხმაურა და მისი დაკითხვა მოითხოვა.

  • მისი თქმით, გოგაშვილმა, როგორც უსაფრთხოების სამსახურის ყოფილმა მოადგილემ, გატაცების ყველა დეტალი იცის.
  • მანამდე, 9 ივნისს მუხთარლი ევროპარლამენტის რეზოლუციას გამოეხმაურა, რომელიც ბიძინა ივანიშვილისთვის სანქციების დაწესებას ეხებოდა და თქვა, რომ საქართველოდან სწორედ ივანიშვილის დავალებით გაიტაცეს.