Biletebi.ge, რომელიც აეროსმიტის კონცერტებზე ბილეთებს ყიდდა, აცხადებს, რომ მეორე კომპანიამ, TKT.ge-მ, ხელოვნურად შეუქმნა პრობლემა იმ მაყურებელს, რომლებმაც ბილეთი მათი კომპანიის საიტზე არ შეიძინა.

biletebi.ge აცხადებს, რომ ბლექ სი არენას ხელმძღვანელობასთან შეთანხმებით, TKT.ge-ის ბილეთების ნომრების დაშვების სისტემაში ჩატვირთვა უნდა განეხორციელებინა:

"სამწუხაროდ, კონცერტის დღეს, აღნიშნულმა კომპანიამ „ვერ გაართვა თავი“ ამოცანას და ათასობით მაყურებელს შეექმნა სერიოზული დისკომფორტი დარბაზის ტერიტორიაზე შესვლისას, კერძოდ რიგში დგომის დიდი დრო და გაურკვევლობა ბილეთის სკანირების სისტემასთან.

ამ ქმედების სავარაუდო მიზანი იყო იმ მაყურებელის „დასჯა“, ვინც ბილეთები შეიძინა biletebi.ge-ზე".

biletebi.ge წერს, რომ TKT.ge-ის სახელმწიფო უწყებიდან "უმაგრებენ ზურგს":

"ის [TKT.ge] ცდილობს დაისაკუთროს სახელმწიფო მფლობელობაში არსებული დარბაზები და აიძულოს ღონისძიებების ორგანიზატორები, განათავსონ ბილეთები მხოლოდ მათ ვებ-გვერდზე. იმ პირობებში როცა ბევრი ღონისძიება ნაწილობრივ ფინანსდება სახელმწიფოს მხრიდან, ეს რთული გასაკეთებელი არ არის.

biletebi.ge-ის განცხადებით, თბილისის დიდ საკონცერტო დარბაზში ღონისძიების ორგანიზატორები ვერ ახერხებენ განათავსონ ბილეთები სხვა ვებ-გვერდზე და ისარგებლონ ბაზარზე არსებული კონკურენციით, რადგან მათზე ზეწოლას TKT.ge ახორციელებს:

"ამ საბილეთო კომპანიას გადაცემული აქვს მაყურებლის დარბაზში დაშვების და ფილარმონიის სალაროებში ბილეთების გაყიდვის ექსკლუზიური უფლება.ყოველივე ზემოთქმული, ჩვენი აზრით, აკნინებს ამ სფეროში ჯანსაღი კონკურენციის პრინციპებს და იწვევს მდგომარეობის გაუარესებას როგორც ღონისძიების ორგანიზატორებისთვის ასევე ბილეთების გაძვირებას რიგითი მაყურებლისთვის".

20 მაისს, ბლექ სი არენაზე აეროსმიტის კონცერტი გაიმართა. რამდენიმე საათის განმავლობაში ჭიშკართან რიგში მდგარმა მსმენელმა, რომელმაც ბილეთები Biletebi.ge-ზე შეიძინა, შესვლისას შეიტყო, რომ იმ მოსაცდელში მხოლოდ TKT.ge-ზე შეძენილი ბილეთების პატრონები უნდა მდგარიყვნენ და სხვა რიგში გადანაცვლება და ადგილის დაკავება მოუწიათ.

განახლება: TKT.ge-ს პასუხი Biletebi.ge-ის ბრალდებებს.