TKT.ge Biletebi.ge-ის ბრალდებებს პასუხობს და აცხადებს, რომ შეთანხმების მიხედვით, 20 მაისს, კონცერტის დღეს, მომხმარებლის შეყვანის ერთნაირი ვალდებულება ჰქონდათ. ამის შესახებ On.ge-ს TKT.ge-ში განუცხადეს.

TKT.ge-ში ამბობენ, რომ Biletebi.ge მათ და ბლექ სი არენას უმიზეზოდ სდებს ბრალს.

"[კონცერტის დღეს] გვითხრეს, რომ ჩვენ არ მოვდივართ და ადგილზე არ ვართო. ჩვენი თანამშრომლები, რომლებიც კონცერტის მოსასმენად იყვნენ მისულები, მუშაობდნენ და ხელის სკანერებით ცდილობდნენ Biletebi.ge-ის მომხმარებლის შეყვანას, ოღონდ ხალხი არ დაზარალებულიყო. შეუძლებელი შევძელით და Biletebi.ge-ს მომხმარებელი შევუშვით, რომ კონცერტი არ ჩაშლილიყო. მერე ეს იმიჯი ცუდად რომ არ მობრუნებოდა, ადგნენ და ეს სტატუსი დაწერეს. არც ერთი წინადადება არაა სიმართლესთან ახლოს," - აცხადებენ TKT.ge-ში.

Biletebi.ge-მ ფეისბუკზე რამდენიმე საათის წინ სტატუსი გამოაქვეყნა, რომელშიც TKT.ge დაადანაშაულა პრობლემის ხელოვნურად შექმნაში.

"TKT.ge-მ ისინი დასაჯა, ვინც ბილეთები ჩვენთან შეიძინა და მათ სახელმწიფო უწყება უმაგრებთ ზურგს" - წერდა Biletebi.ge ფეისბუკზე.

"ეს ბრალდება ყოველგვარ საფუძველს არის მოკლებული და პირიქით, ამ გზით ცდილობენ თავიანთი წინდაუხედაობის ჩვენზე გადმობრალებას" - ამბობს TKT.ge.

სტატუსი, გამოქვეყნებიდან დაახლოებით 1 საათში, ფეისბუკის გვერდიდან წაიშალა. Biletebi.ge-ს ერთ-ერთი მფლობელის, დავით მიზანდარის თქმით, მომხმარებელი დამატებით რომ არ გაღიზიანებულიყო, სტატუსი წაშალეს.

"ერთი კვირით ადრე გვქონდა ბილეთები TKT.ge-სთვის გადაგზავნილი, რადგან მათ უნდა ჩაეტვირთათ, მათ ჰქონდათ ინტეგრაცია გაკეთებული. ჩვენ რომ გვცოდნოდა, რომ გაპრობლემდებოდა ჩვენ თვითონ გავაკეთებდით ინტეგრაციას. დინამოს სტადიონზე არაერთხელ გაგვიკეთებია," - ამბობს Biletebi.ge-ს ერთ-ერთი მფლობელი და დასძენს, რომ სწორედ ამის გამო არ წაიყვანეს ტექნიკური ჯგუფი.

მისივე თქმით, მათი თანამშრომლები ბლექ სი არენაზე ყოფნის შემთხვევაში მომხმარებელს ვერ დაეხმარებოდა, რადგან შესვლის სისტემას TKT.ge მართავდა.

On.ge ასევე ცდილობს დაუკავშირდეს ბლექ სი არენას. შესყიდვების სააგენტოს საიტზე გამოქვეყნებულ ხელშეკრულებებში ჩანს, რომ TKT.ge-სა და Biletebi.ge-ის მსგავსი ხელშეკრულებები აქვთ გაფორმებული.