ჯონი დეპისა და ამბერ ჰერდის სასამართლო დავის მიხედვით ფილმს გადაიღებენ

ჯონი დეპისა და ამბერ ჰერდის სასამართლო პროცესებს უამრავმა ადამიანმა პირდაპირ ეთერში უყურა. ამ პროცესების შესახებ ახალი ფილმის გადაღება იგეგმება, რომლის გამოსვლის თარიღიც ჯერ უცნობია. ფილმს Hot Take: The Depp/Heard Trial ერქმევა, რომელშიც მთავარ როლებს მარკ ჰაპკა და მეგან დევისი შეასრულებენ.

ფილმში ჯონი დეპის ადვოკატის, კამილა ვასკესის როლს მელისა მარტი შეასრულებს, რეჟისორი კი სარა ლომანი იქნება. "პარტნიორებთან ერთად მზად ვართ, რომ დროულად გადავიღოთ ის ისტორია, რომელიც ჩვენი კულტურის ნაწილი გახდა და იმ უნიკალურ კადრებს ეხება, რომლებსაც მილიონობით ადამიანი მთელი ზაფხულის განმავლობაში თვალს ადევნებდა", — განაცხადა კომპანია Tubi-ის წარმომადგენელმა, რომელიც ფილმს იღებს.

შეგახსენებთ, რომ ჯონი დეპმა ამბერ ჰერდის წინააღმდეგ სასამართლო მოიგო. ჯონი დეპმა ყოფილ ცოლს, ამბერ ჰერდს ცილისწამებისთვის უჩივლა და ზიანის ასანაზღაურებლად $50 მილიონი მოითხოვა. ჰერდმა 2018 წელს The Washington Post-ში გამოაქვეყნა ოპ-ედი, სადაც განაცხადა, რომ ოჯახში ძალადობის მსხვერპლი იყო. ამბერს ტექსტში ყოფილი ქმრის სახელი არ უხსენებია, თუმცა დეპის სარჩელში აღნიშნულია, რომ ოპ-ედი სწორედ მას ეხებოდა, რის გამოც მისი კარიერა დაზიანდა და როლები დაკარგა.

სასამართლოს გადაწყვეტილებით, ამბერს ყოფილი ქმრის სასარგებლოდ $10.4 მილიონის გადახდა დაეკისრა. ჯონი დეპს ამბერ ჰერდისთვის ზარალის ასანაზღაურებლად კი $2 მილიონის გადახდა დაევალა.