დონალდ ტრამპი 22 მაისს ოფიციალური ვიზიტით ეწვია ისრაელს. აშშ-ს 45-ე პრეზიდენტის პირველი საერთაშორისო ტურნე 19 მაისს დაიწყო და ის რვა დღეს გაგრძელდება. ტრამპი ამ პერიოდის განმავლობაში ხუთ ქვეყანას ეწვევა.

ეს არის უპრეცენდენტო შემთხვევა აშშ-ს ისტორიაში, რადგან პრეზიდენტების პირველი საგარეო ვიზიტის ადგილი, როგორც წესი, მეზობელი კანადა ან მექსიკა იყო. ტრამპის ტურნე საუდის არაბეთის დედაქალაქიდან, ერ რიადიდან დაიწყო, სადაც მას პომზპეზური დახვედრა მოუწყვეს. პრეზიდენტმა შეხვედრა გამართა საუდის არაბეთის მეფესთან, სალმან ბინ აბდულაზიზ ალ საუდისთან, მან ასევე მონაწილეობა მიიღო მეფის პატივსაცემად გამართულ ღონისძიებაში და სიტყვითაც გამოვიდა. პრეზიდენტის სიტყვაში აღნიშნული იყო, რომ აშშ არ ებრძვის განსხვავებულ რწმენასა და ისლამს როგორც ასეთს. ხაზგასმით ითქვა, რომ ეს არის ბრძოლა ტერორიზმის წინააღმდეგ და აუცილებელია მჭიდრო თანამშრომლობა, რათა ტერორისტებმა ახლო აღმოსავლეთის რეგიონი სამუდამოდ დატოვონ. ვიზიტის მეორე დღეს ტრამპმა ხელი მოაწერა საუდის არაბეთის ისტორიაში უმსხვილეს სამხედრო ხელშეკრულებას, რომლის თანახმადაც, საუდის არაბეთი აშშ-სგან $110 მლრდ ღირებულების სამხედრო შეიარაღებას შეიძენს. კონტრაქტზე ხელის მოწერის შემდეგ პრეზიდენტმა ტრამპმა განაცხადა რომ, ეს ხელშეკრულება აშშ-ს მოუტანს ახალ სამუშაო ადგილებს. მოლაპარაკებების ასევე შეეხო ირანისა და სირიის კრიზისის საკითხებს, სადაც აშშ-სა და საუდის არაბეთს ერთნაირი პოზიცია აქვს.

რიგით მეორე ქვეყანა პრეზიდენტის ტურნეში ისრაელია. 22 მაისს, ტრამპი ისრაელში ჩაფრინდა. ვიზიტამდე რამდენიმე საათით ადრე გავრცელდა ისრაელის პრემიერ-მინისტრის, ბენიამინ ნეთანიაჰუს ვიდეო მიმართვა, სადაც იგი ამბობს, რომ იგი მოხარულია უმასპინძლოს ტრამპს და ებრაელი ხალხი მას “გაშლილი ხელებით ელოდება”. ისრაელის ვიზიტის მთავარი თემა აშშ-ს პოლიტიკაა ირანთან მიმართებაში, სადაც საპრეზიდენტო არჩევნებში მეორე ვადით აირჩიეს ჰასან როუჰანი. ვიზიტისას ასევე მნიშვნელოვანია სირიის სამოქალაქო კონფლიქტის თემა. ტრადიციულად, აშშ-ს რესპუბლიკელი პრეზიდენტები ლოიალურები არიან ისრაელთან მიმართებით, ამ მხრივ არც ტრამპია გამონაკლისი. საარჩევნო კამპანიის დროს გაკეთებულმა მისმა განცხადებამ იმის შესახებ, რომ მისი არჩევის შემთხვევაში აშშ საელჩოს თელავივიდან გადაიტანდა იერუსალიმში - ისრაელის მუდმივ და ნამდვილ დედაქალაქში, პალესტინისა და რამდენიმე ისლამური სახელმწიფოს აღშფოთება გამოიწვია. ვიზიტისას ტრამპი ასევე შეხვდება პალესტინის ავტონომიის ლიდერს, მაჰმუდ აბასს. განხილვის მთავარი საგანი, სავარაუდოდ, ისრაელი-პალესტინის კონფლიქტი და მისი გადაჭრის გზები იქნება თუმცა, პოლიტიკური მიმომხილველები აღნიშნავენ, რომ ამ მხრივ სერიოზულ გარღვევებს არ უნდა ველოდოთ. ამის შემდგომ დაგეგმილია ტრამპის ვიზიტი ვატიკანში და შეხვედრა რომის პაპთან, ასევე, ვიზიტი ბრიუსელში და ნატოს სამიტზე დასწრება. ტრამპი ტურნეს დიდი შვიდეულის სამიტზე დასწრებით დაასრულებს.