დედოფალი ელიზაბეთი ახლა ბალმორალის ციხესიმაგრეში იმყოფება.

რატომ არის მნიშვნელოვანი: ელიზაბეთ მეორის ჯანმრთელობის მდგომარეობის გაუარესების შესახებ 7 სექტემბერს გახდა ცნობილი, როცა მონარქს შეხვედრის გაუქმება მოუწია, ექიმებმა კი მას მოსვენება ურჩიეს.

  • რამდენიმე საათის წინ ბუკინგემის სასახლემ განცხადება გაავრცელა, რომ დედოფალი ელიზაბეთის ექიმებს მონარქის ჯანმრთელობის მდგომარეობა აფიქრებს, რის გამოც იგი მეთვალყურეობის ქვეშ რჩება.

დეტალები: მედიების ინფორმაციით, დედოფალთან ერთად არიან მისი შვილები, პრინცი ჩარლზი და პრინცესა ანა.

  • პრინცი უილიამი ჩაფრინდა ბალმორალში, კემბრიჯის ჰერცოგინია, კეიტ მიდლტონი კი შვილებთან ერთადაა.
  • პრინცი ჰარი და მეგან მარკლიც ბალმორალში მიემგზავრებიან.
პრინცი ჩარლზი აბერდენის აეროპორტში ჩაფრინდა

პრინცი ჩარლზი აბერდენის აეროპორტში ჩაფრინდა

ფოტო: BBC

ბრიტანელი პოლიტიკოსები შეშფოთებას გამოთქვამენ დედოფლის მდგომარეობის გამო და მას მალე გამოჯანმრთელებას უსურვებენ.

  • "ჩემი და გაერთიანებული სამეფოს ხალხის ფიქრები ახლა მის უდიდებულესობა დედოფალთან და მის ოჯახთანაა", — პრემიერმინისტრი ლიზ ტრასი.
  • "ვიცი, რომ მთელი პალატის სახელით ვლაპარაკობ, როცა ვამბობ, რომ ყველა საუკეთესო სურვილებს ვუგზავნით მის უდიდებულესობას დედოფალს", — პარლამენტის სპიკერი ლინდსი ჰოილი.
  • "მე ვუგზავნი ჩემს გულწრფელ ფიქრებს და ლოცვებს მის უდიდებულესობას დედოფალსა და სამეფო ოჯახს ამ შემაშფოთებელ დროს", — ყოფილი პრემიერმინისტრი დევიდ კამერონი.
ბალმორალის სასახლესთან დაცვა დგას

ბალმორალის სასახლესთან დაცვა დგას

ფოტო: Reuters

ბოლო ცნობები: ბუკინგემის სასახლესთან ადგილობრივები და ტურისტები იკრიბებიან.

  • საპატიო ყარაულის შეცვლის ტრადიციული ცერემონია, რომელიც ხვალ დილით ბუკინგემის სასახლის წინ უნდა გამართულიყო, გადაიდო.
  • როგორც BBC წერს, კათოლიკე, ებრაელი და მუსლიმი ლიდერები ლოცულობენ დედოფლის ჯანმრთელობისთვის.
  • The Guardian კი წერს, რომ BBC-მ რეგულარული გადაცემა შეაჩერა და წამყვანს აცვია ისე, როგორც სამეფო ოჯახის გარდაცვალების შემთხვევაში პროტოკოლი ითვალისწინებს.
ბუკინგემის სასახლეში გვარდიის შეცვლის ცერემონია გაუქმდა

ბუკინგემის სასახლეში გვარდიის შეცვლის ცერემონია გაუქმდა

ფოტო: Getty Images