დონალდ ტრამპი, აშშ-ის პრეზიდენტის რანგში პირველად გაემგზავრა უცხოეთში, კერძოდ, მისი პირველი გაჩერება საუდის არაბეთია.

დღეს 20 მაისს, დონალდ ტრამპი მელანია ტრამპთან ერთად, უკვე ჩავიდა საუდის არაბეთის დედაქალაქში. ერ-რიადის აეროპორტში მათ საუდის არაბეთის მეფე დახვდათ.

საუდის არაბეთის მეფემ ტვიტერზე დაწერა, რომ იგი მიესალმება აშშ-ის პრეზიდენტს და მისი ვიზიტი გააძლიერებს ორი ქვეყნის თანამშრომლობას, გლობალური უსაფრთხოებისა და სტაბილურობისთვის.

21 მაისისთვის, დონალდ ტრამპი არაბეთის ისლამურ ამერიკულ სამიტს დაესწრება ერ-რიადში. პრეზიდენტის 2-დღიანი ვიზიტის ფარგლებში, დაგეგმილია, რომ 100 მილიარდზე მეტი ღირებულების სამხედრო შეთანხმება გაფორმდეს აშშ-სა და საუდის არაბეთს შორის.

როგორც BBC წერს, საუდის არაბეთში ჩასვლისას თავსაბურავი არც ივანკა ტრამპს ეხურა და არც მელანია ტრამპს, ისევე როგორც ბრიტანეთის პრემიერს, ტერეზა მეისა და გერმანიის კანცლერ ანგელა მერკელს, მათი ბოლო ვიზიტისას არაბეთში.

2015 წლის იანვარში კი, დონალდ ტრამპმა მაშინდელი პირველი ლედი, მიშელ ობამა გააკრიტიკა იგივე საქციელისთვის და თქვა, რომ მან მასპინძლები "შეურაცხყო".

პრეზიდენტი რვა დღის განმავლობაში ეწვევა ისრაელს, პალესტინის ტერიტორიებს, ბრიუსელს, ვატიკანსა და სიცილიას.