პროტესტის თანხლებით გამართული კინოჩვენება მზიურში მას შემდეგ ჩაიშალა, რაც 112-ში შეტყობინება შევიდა, რომლის მიხედვითაც ტერიტორიაზე ასაფეთქებელი მოწყობილობა იყო განთავსებული.

ადგილზე მყოფი On.ge-ის ჟურნალისტის თქმით, ევაკუაცია უკვე დასრულებულია. პოლიციამ მოქალაქეები ადგილიდან მანქანებით გაიყვანა. ტერიტორია უკვე დატოვეს აქტივისტებმაც, რომლებიც ჰომოფობიური განწყობების გამო კინოჩვენებას აპროტესტებდნენ.

ფილმი, სახელად პრაიდი, ჰომოფობიასთან, ტრანსფობიასთან და ბიფობიასთან ბრძოლის საერთაშორისო დღესთან დაკავშირებით შეირჩა და ის ტეტჩერის დროინდელ ბრიტანეთში, ლგბტ პირების მხრიდან სამოქალაქო აქტივიზმში ჩართულობის მნიშვნელობას ეხება.

კინოჩვენების დაწყებამდე, მზიურთან თავი მოიყარეს ჰომოფობიური განწყობების მქონე პირებმა. მათი მიზანი ფილმის თავისუფალი ჩვენების ჩაშლა იყო. ადგილზე მყოფი On.ge-ს ჟურნალისტის თქმით, შეკრებილების მხრიდან ისმოდა შეურაცხმყოფელი შეძახილები.