რამდენიმე დღის წინ სოციალურ ქსელებში გავრცელდა ფინეთის პრემიერმინისტრის, სანა მარინის ვიდეო წვეულებიდან, რომელშიც ჩანს, რომ ის ცეკვავს და მღერის. ამას მარინის კრიტიკა მოჰყვა, ქალები კი ფინეთის პრემიერმინისტრის მხარდასაჭერად გაერთიანდნენ.

რატომ არის მნიშვნელოვანი: ცეკვის ვიდეოების გავრცელების შემდეგ სანა მარინს არაერთხელ მოუწია თავის მართლება.

  • საერთაშორისო მედიებში გავრცელებული ინფორმაციით, მარინი გააკრიტიკეს იმის გამო, რომ "პრემიერმინისტრისთვის შეუფერებლად იქცევა".
  • ასევე, იმის გამო, რომ როდესაც რუსეთთან დაძაბულობა იზრდება, ფინეთი NATO-ში გაწევრიანებას ცდილობს და ვლადიმერ პუტინი უკრაინაში ომს აწარმოებს, წვეულების მოწყობა უპასუხისმგებლობაა.
  • პრემიერმინისტრმა განმარტა, რომ ეს კადრები საჯარო სივრცისთვის არ იყო განკუთვნილი.

რა თქვა პრემიერმინისტრმა: ოპოზიციურმა პარტიებმა მისგან ნარკოტესტის ჩაბარება მოსთხოვეს.

  • მარინმა ნარკოტიკის მოხმარება უარყო, თუმცა მის მიმართ არსებული ეჭვების გასაფანტად ნარკოტესტი ჩააბარა და პასუხი ნეგატიური იყო.
  • "მე ვიცეკვე, ვიმღერე და გავერთე — ეს სრულიად ლეგალურია", — თქვა მან.

#სოლიდარობა სანა მარინს: ქალებმა გადაწყვიტეს პრემიერმინისტრის მხარდასაჭერად საკუთარი ცეკვის ვიდეოები გამოექვეყნებინათ.

  • თავდაპირველად ვიდეოების გადაღება ფინეთში დაიწყეს, შემდეგ კი მათ შეუერთდნენ ქალები სხვადასხვა ქვეყნიდან.
  • ისინი აქვეყნებენ ვიდეოებს ჰეშთეგებით "#სოლიდარობა სანა მარინს", "#ცეკვა თერაპიაა, გააგრძელე ცეკვა სანა მარინ".
  • მარინის მხარდასაჭერად ფლეშმობში მონაწილეობა მიიღეს პოლიტიკოსებმა ავსტრიიდან და გერმანიიდანაც. მათ შორის, ერთ-ერთი კაცია.

"ყველაზე მაგარი პრემიერმინისტრი მსოფლიოში": სწორედ ეს სტატუსი მიანიჭა მარინს გერმანულმა გამოცემამ.

  • ის ხშირად ესწრება სხვადასხვა მუსიკალურ ფესტივალებს.
  • "ვაპირებ ვიყო ზუსტად ის პიროვნება, რომელიც ვიყავი აქამდე და იმედი მაქვს ამას მიიღებთ", — ასე გამოეხმაურა მარინი განვითარებულ მოვლენებს.