ტელეკომპანია მთავარი, ფორმულა და TV პირველი ერთობლივ განცხადებას ავრცელებენ, სადაც ისინი კომუნიკაციების ეროვნული კომისიის 2022 წლის 11 აგვისტოს გადაწყვეტილებაზე საუბრობენ.

რატომ არის მნიშვნელოვანი: ტელევიზიები ამბობენ, რომ კომუნიკაციების კომისიის გადაწყვეტილება დაუსაბუთებელი, უკანონოა და მათ წინააღმდეგ მიმართულ ორკესტრირებულ სადამსჯელო ქმედებად მიიჩნევენ.

• განცხადების მიხედვით, გადაწყვეტილებით არსებითად განსახილველად იქნა მიღებული ქართული ოცნების განცხადება, რომლის მიზანი კრიტიკული სარედაქციო პოლიტიკის გამო მათი დასჯა და მძიმე ფინანსური სანქციების დაკისრებაა.

დეტალები: საქმე 8 აგვისტოს ქართული ოცნების მიერ კომუნიკაციების კომისიაში შეტანილ განცხადებას ეხება, რომლის საფუძველზეც ის სამი მედიის, ფორმულას, მთავარი არხისა და TV პირველის სამართალდამრღვევად ცნობას ითხოვს "შინ ევროპისკენ" კლიპის გაშვების გამო.

• მათი თქმით, სამივე მაუწყებლის წარმომადგენელმა მიუთითა, რომ კომუნიკაციების კომისიას მოსამზადებელ სხდომაზევე უნდა შეემოწმებინა სადავო რეკლამა არის პოლიტიკური/წინასაარჩევნო თუ სოციალური.
• ხოლო ამის გადაწყვეტის შემდეგ, კანონმდებლობის საფუძველზე ემსჯელა შედის თუ არა მის კომპეტენციაში მსგავსი რეკლამის შინაარსის შეფასება.
• განცხადების მიხედვით, აღნიშნავდნენ, რომ სადავოდ გამხდარი რეკლამა წარმოადგენდა სოციალურ რეკლამას, სრულად ექცეოდა სოციალური რეკლამის კანონისმიერ დეფინიციაში.
• ამას გარდა, მიუთითებენ, რომ რეკლამის მიზანი მიზანი საზოგადოებისთვის 24 ივნისის საქართველოს ევროინტეგრაციის მხარდასაჭერ აქციაზე გამოსვლისკენ მოწოდება და არა რომელიმე პარტიის მიმართ საზოგადოებაში უარყოფითი აზრის ფორმირება იყო.

განცხადების მიხედვით, კომისია თავი აარიდა მსჯელობას იმასთან დაკავშირებით, რომ ქართული ოცნება არ არის უფლებამოსილი სუბიექტი/დაინტერესებული პირი, იდავოს კომისიაში მსგავს საკითხზე.

• მათივე თქმით, საყურადღებოა, რომ კომუნიკაციების ეროვნული კომისიის მიერ მიღებულმა გადაწყვეტილებებმა არაერთხელ შეუქმნა საფრთხე კრიტიკული მედიის სიტყვისა და გამოხატვის თავისუფლებას.
• "ხელისუფლება მარეგულირებელი ორგანოს საშუალებით ცდილობს, ერთი მხრივ, კრიტიკულად განწყობილი მედიებისთვის დამატებითი ფინანსური სანქციების დაწესებას და მათთვის ფინანსური დაბრკოლებების შექმნას, მეორე მხრივ, საზოგადოებაში კრიტიკული/ნეგატიური აზრის ჩახშობას".

ფართო სურათი: ტელევიზიები აცხადებენ, რომ კრიტიკული მედიისადმი ხელისუფლების ამგვარი მიზანმიმართული იერიში კიდევ ერთი დამაბრკოლებელი ფაქტორი გახდება ქვეყნის ევროპული ინტეგრაციის გზაზე.

არქივიდან: კომუნიკაციების კომისიამ კრიტიკული ტელევიზიების წინააღმდეგ "ოცნების" საჩივარი წარმოებაში მიიღო.

• მმართველი პარტია მთავარ არხს, ფორმულასა და TV პირველს #შინევროპისკენ კამპანიის ფარგლებში გამართული, 24 ივნისის აქციის კლიპის გამო უჩივის.