"ოცნებიდან" წასულები მთავარ მიზეზად კვლავ "თავისუფლად საუბარს" ასახელებენ და ამჯერად ევროკავშირსა და ევროპარლამენტარებს აკრიტიკებენ.

რატომ არის მნიშვნელოვანი: ბოლო დღეების განმავლობაში მმართველი პარტია და თანამდებობები ლაგოდეხის, თერჯოლის, ახალციხის, ჭიათურის, გორის და თელავის საკრებულოს წევრებმა დატოვეს.

  • განცხადებებში ისინი "ოცნებიდან" წასული სამი დეპუტატის მესიჯბოქსებსა და ნარატივებს ავრცელებდნენ, მათ შორის, ანტიდასავლურს.

ასპინძის საკრებულოს წევრი ქართული ოცნების წევრების ანტიდასავლურ ნარატივს იმეორებს და ამბობს, რომ "ძალიან რთულია ჩუმად უყურო, თუ როგორ აზიანებენ ევროპულ იდეას საქართველოში ნაციონალური მოძრაობა და მათი უცხოელი ლობისტები".

  • გია ჭელიშვილი რასა იუკნევიჩიენეს, ანდრიუს კუბილიუსს, მარკეტა გრეგოროვასა და ანა ფოტიგას "ბოტოტმოქმედი ნაცმოძრაობის მფარველებად" მოიხსენიებს.

ადიგენის საკრებულოს წევრი წერს, რომ საჭიროა თავისუფლად საუბარი "ყველაფერზე რაც ხდება".

  • "ჩვენმა საზოგადოებამ უნდა მიიღოს იმ კითხვებზე პასუხები, რომელიც არსებობს".
  • "სწორედ ამიტომ, იმისთვის, რომ მმართველ გუნდს უხერხულობა არ შევუქმნა, მე ვტოვებ ფრაქციის თავმჯდომარის პოსტს და პარტია ქართულ ოცნებას, ვაპირებ შევუერთდე იმ ადამიანებს ვინც მზადაა ისაუბროს უფრო ღიად და დაიცვას მშვიდობა, სტაბილურობა ამ ქვეყანაში და ამ ქვეყნის ევროპული მომავალი".