მედიის თქმით, რუსი ექსპორტიორები თხევადი ნავთობის გაზის (LPG) მიწოდებას შავი ზღვის პორტის გავლით ივლისში დაიწყებენ, რადგან, ტრადიციული, საექსპორტო მარშრუტები დახურულია.

რატომ არის მნიშვნელოვანი: რუსეთმა თხევადი ნავთობის გაზის მიწოდება უკრაინისთვის 24 თებერვალს, ომის დაწყების შემდეგ შეწყვიტა.

  • ასევე, უკრაინის გავლით სარკინიგზო ტრანზიტი რუმინეთში, უნგრეთსა და მოლდოვაშიც შეაჩერა.
  • გამოცემა მიუთითებს, რომ ეს ექსპორტიორებს ახალი მარშრუტების ძებნას ავალდებულებს.

Refinitiv Eikon-ის სტატისტიკაზე დაყრდნობით, Reuters წერს, რომ გაყიდვები მკვეთრად შეამცირა ფინეთმაც, რომელიც რუსეთის LPG-ის კიდევ ერთი დიდი საექსპორტო მარშრუტია.

  • გამოცემა აღნიშნავს, რომ გასულ წელს რუსეთმა თავისი თხევადი ნავთობის გაზის 25% უკრაინასა და ფინეთში გაიტანა.

დეტალები: მათივე მონაცემების მიხედვით, ივლისში დაახლოებით 3 ათასი ტონა LPG სურგუტიდან ფოთში სარკინიგზო ტრანსპორტით გაიგზავნება.

  • ამის შემდეგ საზღვაო გზით ვარნაში გადაიტანენ.
  • გამოცემა წერს იმასაც, რომ ბულგარეთში თვეში 30 ათასიდან 35 ათას ტონამდე LPG-ის მოიხმარენ, საიდანაც 10 ათას ტონას თავად აწარმოებენ, დანარჩენს კი რუმინეთისა და რუსეთისგან ყიდულობენ.