პრემიერმინისტრმა პარტიის დამაარსებელთან ურთიერთობის შესახებ ვრცელი ფეისბუქპოსტი გამოაქვეყნა, სადაც ივანიშვილის "დამსახურებებზე" და დეოლიგარქიზაციის მოწოდებებზეც ისაუბრა.

რატომ არის მნიშვნელოვანი: ევროკომისიის ერთ-ერთი რეკომენდაცია საქართველოსთვის სწორედ დეოლიგარქიზაციაა.

  • ქართული ოცნების მტკიცებით მიუხედავად, რამდენიმე ევროპარლამენტარმა პირდაპირ თქვა, რომ ოლიგარქში და დეოლირგიზაციის მოწოდებაში ივანიშვილს გულისხმობენ.

ღარიბაშვილი წერს, რომ ასეთი განცხადებები მისთვის შეურაცხმყოფელია, რადგან საპარლამენტო რესპუბლიკაში ქვეყნის პოლიტიკური ლიდერი პრემიერმინისტრია.

  • "როდესაც ვიღაც ამტკიცებს, რომ პრემიერმინისტრი ფარსის ნაწილია და სინამდვილეში იმ ადამიანისგან იმართება, რომელმაც გასული წლის იანვარში პოლიტიკიდან გასვლის გადაწყვეტილება მიიღო, ეს არა მხოლოდ მე, არამედ სახელმწიფოსაც შეურაცხყოფს".

გარდა ამისა, ღარიბაშვილი არ უარყოფს, რომ მათ პოლიტიკურ გუნდს "განსაკუთრებული დამოკიდებულება" აქვს ივანიშვილის მიმართ.

  • თუმცა აბსურდსა და ფარსს უწოდებს იმას, რომ პარტიის ყოფილი დაამარსებელი მთავრობასა და პარლამენტს მართავს.
  • მისივე თქმით, ივანიშვილმა "ღირებულებები და თამაშის წესები" დატოვა, რომელიც სამშობლოს სიყვარულსა და კანონის პატივისცემას გულისხმობს.
  • "დატოვებულ თამაშის წესებთან სრულიად შეუთავსებელია ყალბი ბრალდება ოლიგარქიული მმართველობის შესახებ".
  • "თუ ვინმე ფიქრობს, რომ სანქციები ბიძინა ივანიშვილის კარნახით არ დავაწესეთ და ომშიც მისი კარნახით არ ჩავერთეთ, ძალიან ცდება".

დეტალები: პრემიერმინისტრმა თქვა, რომ ივანიშვილის "ქველმოქმედებაზე" არ ისაუბრებს, თუმცა კიდევ ერთხელ ჩამოთვალა ქვეყნის წინაშე ივანიშვილის "დამსახურებები", შემდეგ კი აღნიშნა:

  • "თუ ამას უწოდებენ ოლიგარქიზაციას და ამისათვის უნდათ ბიძინა ივანიშვილის დასჯა, ესეც პირდაპირ უნდა თქვან".
  • ასევე, "კამპანიის ავტორებს" მოუწოდა "კეთილი ინებონ და განმარტონ", რას გულისხმობენ როდესაც ოლიგარქსა და დეოლიგარქიზაციაზე საუბრობენ.