გერმანიის ქალაქ ოლდენბურგში 8 წლის ბიჭი დაიკარგა, რომელსაც ოჯახი და პოლიცია 8 დღის განმავლობაში უშედეგოდ ეძებდა. ადგილობრივი პოლიციის განცხადებით, 8 წლის ჯო მისი სახლიდან 300 მეტრში მდებარე საკანალიზაციო ჭაში მას შემდეგ იპოვეს, რაც ერთ-ერთმა გამვლელმა ამ ადგილზე ყოფნისას ხმები გაიგონა.

პოლიციის თქმით, პატარა ბიჭი შიშველი იყო, რომელსაც ძალიან სციოდა და გაუწყლოების სიმპტომებიც აღენიშნებოდა, თუმცა სხვა მხრივ მის სიცოცხლეს საფრთხე არ ემურებოდა. 8 წლის ჯო მაშინვე ადგილობრივ საავადმყოფოში გადაიყვანეს.

ფოტო: Getty Images

"ახლა შეგვიძლია, შვებით ამოვისუნთქოთ. პატარა ბიჭის ჯანმრთელობა სანდო ხელშია", — განაცხადა ადგილობრივი პოლიციის უფროსმა. მისივე თქმით, ჯო 17 ივნისის საღამოს შემდეგ დაკარგულად ითვლებოდა. პოლიციის აზრით, ჯო საკანალიზაციო ჭაში თავად ჩაძვრა და რამდენიმე მეტრის შემდეგ უკან ამოსვლა ვეღარ შეძლო.

ამ ეტაპზე ჯოს ჩვენების მიცემა არ შეუძლია, თუმცა პოლიცია ვარაუდობს, რომ სამაშველო ძებნის დროს მას არაფერი ესმოდა, ან ეს სიტუაცია თამაშის ნაწილად აღიქვა. პოლიცია იმედოვნებს, რომ ჯოს სრული ამბის მოსმენას მალე შეძლებს, როცა ბიჭი გამოჯანმრთელდება და საავადმყოფოს დატოვებს.