პრემიერმინისტრი თბილისი პრაიდსა და მოძრაობა სირცხვილიას ენმ-სთან კავშირს აბრალებს და ამტკიცებს, თითქოს ღირსების მარშის იდეა მიხეილ სააკაშვილის და ოპოზიციის წახალისებული იყო.

რატომ არის მნიშვნელოვანი: პრორუსული და ჰომოფობიური ჯგუფების ძალადობაზე პასუხისმგებლობას ის არათუ სამართალდამცავებს ან ამ ძალადობის ორგანიზატორებს აკისრებს, მომხდარს აქტივისტებს აბრალებს.

  • აძლიერებს ძალადობრივი ჯგუფების ნარატივს, თითქოს ადამიანები არა საკუთარი უფლებების დასაცავად, არამედ პოლიტიკური ინტერესებისთვის გამოვიდნენ.
  • როცა ქართულ ოცნებას ვინმეს დისკრედიტაცია სურს, ყველას ენმ-სთან აკავშირებს და ამ პარტიისადმი საზოგადოების ნაწილის უკმაყოფილებას მათ წინააღმდეგ მიმართავს.

დეტალები: ჰომოფობიური ქვეტექსტით ღარიბაშვილი აქტივისტებს "ანტიეროვნული, ანტისახელმწიფოებრივი პროვოკაციის" მოწყობაში ადანაშაულებს.

  • "უნდოდათ გამოეწვიათ დესტაბილიზაცია ქვეყანაში. არეულობა მასობრივი, შეტაკებები, პოლიციას გამოეყენებინა ძალა".

კონტექსტი: ღარიბაშვილმა 5 ივლისსაც თბილისი პრაიდის ბრალეულობაზე ისაუბრა. მაშინ, როცა თბილისში ძალადობრივი ჯგუფები იყვნენ გამოსული აქტივისტებს პროვოკაცია დააბრალა, რასაც არასამთავრობო სექტორი ძალადობის წახალისებად აფასებს.

არქივიდან: 5 ივლისს, როცა ადამიანები საკუთარი ფუნდამენტური უფლებების დასაცავად რუსთაველის გამზირზე უნდა გამოსულიყვნენ, ჰომოფობიურმა ჯგუფებმა ტერიტორია დაიკავეს და ჟურნალისტებს ფიზიკურად გაუსწორდნენ.

  • თავდასხმის შედეგად დაშავდა 50-ზე მეტი ჟურნალისტი.
  • 11 ივლისს აქციაზე ნაცემი ოპერატორი, ლექსო ლაშქარავა გარდაიცვალა.
  • ძალადობის ორგანიზატორების პასუხისმგებლობის საკითხი დღემდე არ დამდგარა - ძალადობრივმა ჯგუფებმა კი ერთი წლის შემდეგ ისევ დაიწყეს მუქარა პრაიდის კვირეულის ფარგლებში გასამართ ღონისძიებებზე.