საპატრიარქოს საზოგადოებრივი ურთიერთობის სამსახურის უფროსი, ანდრია ჯაღმაიძე აცხადებს, რომ სალომე ზურაბიშვილს ილია მეორესთან შეხვედრა სურდა, რაც დღეს "ვერ ხერხდება".

რატომ არის მნიშვნელოვანი: საქართველოს პრეზიდენტის ბრიფინგის შემდეგ, სადაც ზურაბიშვილმა მმართველი პარტია და მისი ქმედებები გააკრიტიკა, ქართულმა ოცნებამ პრეზიდენტს საპასუხო მიმართვა მიუძღვნა.

  • ეს პირველი შემთხვევაა, როცა პატრიარქისა და პრეზიდენტის შეხვედრის ჩაშლის შესახებ ინფორმაცია გავრცელდა;
  • ეს დროში ემთხვევა პრეზიდენტის კრიტიკულ განცხადებებს მმართველი გუნდის მიმართ და გაჩნდა აღქმა, რომ შესაძლოა, სწორედ ამას უკავშირდებოდეს.

ანდრია ჯაღმაიძემ ამის შესახებ სატელეფონო კომენტარი ტელეკომპანია იმედთან გააკეთა და თქვა, რომ მიზეზი არ იცის, რადგან პროცესში თავად არ ყოფილა ჩართული.

  • "პატრიარქთან ნებისმიერ დროს ვერ ხერხდება შეხვედრა".

პასუხად, პრეზიდენტმა საკუთარ Facebook-გვერდზე განცხადება გაავრცელა, სადაც ანდრია ჯაღმაიძე გააკრიტიკა და თქვა, რომ მან უნდა იცოდეს, "როგორ მოიხსენიოს ქვეყნის პატრიარქი და პრეზიდენტი".

  • "პატრიარქთან შეხვედრა პრეზიდენტის პირადი ხასიათის თხოვნა იყო. პატრიარქის სურვილის გარეშე, პრეზიდენტი არასდროს ასაჯაროებს შეხვედრის შესახებ ინფორმაციას და შეხვედრა არც არასდროს მოუთხოვია კატეგორიულად კონკრეტულ დროს";
  • "პრეზიდენტს პატრიარქისადმი აქვს განსაკუთრებული პატივისცემა, სიყვარული და სულიერი დამოკიდებულება, რაც ინსტიტუციურ ჩარჩოებს სცდება".
  • "ამ მოცემულობიდან გამომდინარე, მიზანშეწონილი არაა, რომ საპატრიარქოს საზოგადოებასთან ურთიერთობის სამსახურის ხელმძღვანელი აკეთებდეს საჯარო კომენტარებს".